ВЕРБАС – Вчера, 15. новембра, на площи Роботней єдинки ,,Чистота” Явного комуналного подприємства ,,Комуналєц”, отримана смотра механїзациї жимскей служби. З того подприємства сообщене же жимска служба порихтано дочекує и тоту сезону. Смотри присуствовали предсидатель Општини Вербас Милан Ґлушац, представнїки локалней самоуправи, Полицийскей станїци Вербас, як и руководство ЯКП ,,Комуналєц”.
– ЯКП ,,Комуналєц” задлужене за коло 260 километери локалних драгох. Циль нам же бизме нашим согражданом олєгчали преходзенє кед єст шнїгу и ляду, же би були цо безпечнєйши у транспорту. За функционованє жимскей служби локална самоуправа видвоєла 10 милиони динари – гварел предсидатель Општини Вербас Милан Ґлушац.
Директор ЯКП ,,Комуналєц” Синиша Адамович визначел же механїзация пририхтана за интервенциї, як и же набавени шицки потребни аґреґати за третированє шнїгу и ляду.
– Од прешлого року нам остало 106 тони натриюм-хлориду. За тоту сезону ше набави ище 350 тони солї. Тиж, обезпечели зме и други аґреґати – асфалтну масу и натриюм-хлорид. Порихтани зме за наиходзацу сезону. Кед ше случи же будзе падац шнїг и после 15. марца, жимска служба предлужи з роботу, як було и предходних рокох – гварел Адамович.
За розлику од предходней жими, за отримованє драгох Вербас–Бачке Добре Польо–Змаєво и Вербас–Коцур од тей сезони одвичательне подприємство ,,Бачкапут”. ЯКП ,,Комуналєц” будзе отримовац драги у Вербаше по приоритетох, тиж и општински драги Равне Село–Кулпин, Савине Село–Косанчич и Коцур–Змаєво, як и главни улїчки през населєни места.
