ВЕРБАС – У вербаским Културно-просвитним дружтве (КПД) „Карпати” внєдзелю, 13. януара, зоз пригодну програму означене Националне швето Руснацох у Републики Сербиї, котре пада на штварток, 17. януара.
Преслава була отримана у просторийох Дружтва, а участвовали Хор и Руска жридлова шпивацка ґрупа, котри робя як секциї КПД „Карпати”.
На початку програми госцох привитали предсидатель и подпредсидатель Дружтва – Славко Барановски и др Деян Загорянски и заменїцу предсидателя Скупштини општини Вербас Мартицу Тамаш, а потим ше публики представели члени Хору и Рускей жридловей шпивацкей ґрупи зоз даскельо шпиванками.
По законченю програми у орґанизациї Дружтва отримани и традицийни „Торба бал” на котрим госци уживали у музики и друженю.
КПД „Карпати” и того року перши означели Националне швето Руснацох, а того тижня будзе означене у скоро шицких местох дзе жию Руснаци.
