БЕОҐРАД – Конкурс за студентох новинарства и младих новинарох за найлєпши прилог о прикладох добрей пракси зоз соживота у мултиетнїчних штредкох, хтори розписало Здруженє новинарох Сербиї и сайт „Сушедски новосци” („Комшијске новости”) тирва по пондзелок, 5. октобра.
Тексти треба послац на е-адресу mikvalentin@yahoo.com, а вони потим буду обявени на сайту www.komsijskenovosti.rs Найлєпши текст будзе и наградзени.
Конкурс ше запровадзує у рамикох проєкту „Сушедски новосци – сервис добрих висткох”, чий циль розбиц предрозсудки и стереотипи у писаню о националних меншинох и пре порушованє младих новинарох же би писали о прикладох добрей пракси.
Сайт „Сушедски новосци” основало Здруженє новинарох Сербиї и Еврореґийни центер за розвой дружтва у мултиетнїчних штредкох „In media res”, а на нїм ше обявює тексти на сербским язику з меншинских медийох и преноши тексти з меншинских друкованих медийох хтори нє маю онлайн виданє.