ВЕРБАС – Општина Вербас подписала контракти зоз здруженями гражданох, нєвладовима орґанизациями и културно-уметнїцкима дружтвами хтори на явним конкурсу здобули право на финансийну потримовку з општинского буджету.
Општина Вербас за активносци дружтвених орґанизацийох видвої вєдно 2,5 милиони динари. Условия конкурсу сполнєли 47 цивилни орґанизациї, медзи нїма и нашо орґанизациї з Коцура и Вербасу, а конкуровали прейґ 70.
Так парохийни Каритас у Коцуре достанє 30 000 динари, КПД „ДОК” з Коцура 50 000 динари, КПД „Карпати” з Вербасу 200 000, КУД „Жатва” з Коцура тиж 200 000, а Етно-клуб „Одняте од забуца” з Коцура 30 000 динари.
Пред спомнутим, подобни контракти з локалну самоуправу подписали и 7 вирски заєднїци и церковни општини, а за їх финансованє Општина Вербас предвидзела вєдно милион динари.
Грекокатолїцка парохия Св. Владимира у Новим Вербаше достанє 100 000 динари, док нашо парохиї у Старим Вербаше и Коцуре нє достаню средства, понеже нє сполнєли условия конкурсу, точнєйше нє придали ришенє о упису церкви до реґистру вирох.