Гоч ше нїґда нє будзе шицко знац о улоги о. Гавриїла Костельника у Львовским псевдособоре 1946. року, у можлївосци сом дакус додац ґу тому цо було о нїм написане у „Руским слове”.
Костельникова улога була, вшелїяк контроверзна, бо и вон, можебуц як чловек, бул на одредзени способ контроверзни, а то ше барз указало праве и у вязи зоз псевдособором и шицким тим цо з тим Собором було повязане.
Костельникова дзивка Христина авторови тих шорикох приповедала же жаданє єй оцa, о. Гавриїлa, було зачувац Українску грекокатолїцку Церкву, бо єй грожела подполна ликвидация з боку совєтского большевизма.
Окрем того, у України ше у тим чаше думало же швидко придзе до зраженя медзи СССР и заходнима сoюзнїками – ЗАД, Вельку Британию и другима. Та требало прежиц тот кратки час, и вец нє будзе проблем зволац заш єден таки собор и врациц ше до униї.
Же Костельник наисце так думал, може послужиц факт же анї його супруга, анї єдно їх дзецко нє прияло православє, алє до шмерци остали грекокатолїки, цо явно манифестовали зоз своїма приходами до Риму на рижни сходи грекокатолїкох при українскей грекокатолїцкей церкви св. Софиї. Праве там ше з нїма упознал и автор тих шорикох.
А як контроверза такого становиска, нєодлуга после собора, зявює ше єдно писмо о. Гавриїла Костельника написане о. Янкови Будинскогому до Петровцох. У тим писме вон пише менєй-вецей так: „Придзем я там до вас и преведзем вас на православиє”.
Розуми ше же тото писмо виволало ту, при наших священїкох одредзени нємир. Тото писмо мал у рукох теди ище богослов Петро Овад, котри єден час бул на парохиї у Петровцох. Вон го преписал, и препис того писма дал авторови тих шорикох, котри го може буц ище и ма у своїм архиве.
Ище теди ше медзи нашима священїками ширели гласи же то нароком було так написане писмо, бо Костельник верел же його писма читаю одредзени служби.
Окрем Г. Костельника, котри бул заштрелєни, и други двоме члени инициятивней ґрупи псевдособору, владикове Антоний Пельвецкий и Михайло Мельник пошвидко поумерали под нєяснима околносцами.
А же таки и подобни контроверзи на України у тим чаше були досц часте зявенє, указує и слїдуюце. У туристичним галицким городзе Трускавцу, у православней парохиї, у котрей бивал православни парох Цолта, родзина автора тих шорикох, на мансарди того православного парохиялного дома, у исти час бивал илеґални грекокатолїцки владика Йосафат Федорик, котри ше тиж и костирал ту при панїматки Надїї Цолта.
Автор тих шориких отримовал вязу з тим владиком и преношел його писма до Риму, а з Риму до ньго. Робела то и авторова мац, Мария Миз и монахиня служебнїца, шестра Йосафата (Молнар).
Медзи иншим, и на таки способ Грекокатолїцка Церква на України прежила чежки часи репресиї.