Єден зоз наших найкрасших фестивалох, манифестация котра уж 16 роки прикрашує и збогацує фестивалски календар рускей заєднїци, и того року отримани у просторийох Културно-просвитного дружтва „Карпати” у Вербаше. Гоч ше з рока на рок числени аматере з того вербаского Дружтва зочую зоз рижнима виволанями, заш лєм потвердзели же зоз заєднїцкима моцами мож вельо того зробиц, та так и успишно порихтац и нє претаргнуц традицию длугорочного Хорского фестивалу „Карпати”.
Красни и цепли єшеньски вечар прикрашел тото стретнуце у Вербаше, на месце дзе ше шпиванку уж децениями пестує, чува и преноши з ґенерациї на ґенерацию. Музичну часц своєй роботи представели числени шпиваче зоз Коцура, Шиду, Руского Керестура, Нового Саду, Суботици и домашнї з Вербасу. Хори и вокални состави, гоч розличних ґенерацийох и зоз розличних стредкох, того вечара на бини указали святочносц, и нїтку котра их шицких повязує – любов ґу шпиванки и жаданє подзелїц ю з другима. Лєм єдна думка ше могла вироїц – кед вецей гласи постаню єден, то просто цошка вецей од музики. Заєднїцки дих, исти чувства и склад, то краса хорского шпиваня – слуханє єдни других, довириє, и заєднїцтво.
Вербаски фестивал нагода же би ше позберали нє лєм хори и ґрупи, оркестри и музичаре, алє же би ше зишли приятелє, же би шпиванка постала место стретнуца, а кажде стретнуце нагода же би ше дацо нове чуло, научело, и найкрасши памятки зоз собу однєсло. Таки збуваня забераю важне место у културним живоце рускей заєднїци.
Вредносц вербаского Фестивалу у тим же чува руски язик, културу и традицию на найкрасши способ – зоз шпиванку. Кажди наступ ноши часц свойого музичного искуства и прето Фестивал хорского шпиваня интересантна подїя – у єдним вечару мож чуц розлични интерпретациї, розлични фарби гласох и розлични музични приповедки. А по нашмеяних очох и гласних аплаузох публики, прешвечени зме же Хорски фестивал „Карпати” ище длуго будзе часц нашей традициї, и нашо шерца виполньовац лєм з найкрасшима чувствами.