Павза лєбо тайм-аут, як ше на спортских змагањох глєда же би ше на кратши час одпочинуло, дацо пременєло и опробовало даяки иншаки приступ у змаганю кед потерашнї нє дава резултат. Павза нє значи конєц. После павзи ше змаганє предлужує. Кед внєдзелю предсидатељ Вучич дал задзекованє, а пондзелок свойо овласценя препущел Ани Брнабич, праве на єй родзени дзењ, вон нє направел павзу. Напроцив, вон предлужел свою кампаню котру водзи одкеди є у политики. Лєм же би му тота кампаня, поправдзе, могла буц и найвекши испит од приходу напреднякох на власц.
Кед ше його лїстини уда, после виберанкох, 25. октобра, обезпечиц векшину у парламенту и вон постанє премиєр, велї роботи котри робел, лєбо их себе приписовал, достаню и свой одвитуюци институцийни рамик. Функция би ше пременєла, алє би остало питанє кељо ше пременєл способ владаня у законских и уставних рамикох за векшину роботох котри му приписовани през два мандати на чолє Сербиї, а над котрима нє мал компетенциї.
У тим рахунку, по першираз од 2012. року, озбильно му може закомпликовац конєчне ришенє рух котри водза студенти зоз Студентскей лїстини. По першираз од хвиљки кед СНС пришла на власц, случує ше можлївосц же тота лїстина пойдзе до опозициї.
По першираз наспрам себе ма малу политичну силу котра позберала людзох далєко од партийних кругох. По першираз патриме на кампаню у котрей СНС сама нє одредзує анї теми, анї темпо.
Масовне одволанє людзох котри годзинами чекали у километерских шорох же би подписали потримовку Студентскей лїстини, а вец и виходзели на студентски штанди и дочековали студентох на бициґлистох котри ше вожели ширцом по Сербиї и ношели Устав, указало же людзе нє маю проблем явно указац же су процив єдней структури и номенклатури котра зацаровала зоз Сербию декаду и пол.
А Устав на бициґли ношел просте порученє – же закони ознова муша важиц за шицких, а же партийна кнїжочка нє шме служиц як имунитет.
Увидзиме чи ше дацо пременї з Вучичовим уходом до кампанї без предсидатељскей функциї и яки „трики” остали у старим радикалским мантилу бувшого министра информованя, першого подпредсидателя, та предсидателя Влади Сербиї и предсидателя Сербиї котри вкупно на власци препровадзел 16 роки и 9 мешаци, а на державним буджету як републичи посланїк и одборнїк у беоґрадскей скупштини є од 1994. року, з кратким претаргнуцом од 2008. по 2012. рок.
Испит дружтва котре треба же би указало же змена власци припада демократиї и теди кед треба зменїц гевтих котри ше зоз державу виєдначели. Искуство зоз фантомскима виберачами, куповањом гласох и уценьованями нє дава нам вельо причини за спокой, алє нам дава причину же бизме виберанкови процес з увагу контроловали и глєдали одвичательносц за кажде злохаснованє.
И док держава у в. д. стану, остава нам питанє з початку тей статї: чи патриме лєм на павзу помедзи два Вучичово функциї, чи на конєц єдней системи чий вон символ и початок єдного нового поглавя у нашей историї?
Испитне питанє пред нами 25. октобра – павза, чи конєц?