НОВИ САД – Граждански фонд (ГФ) „Панония” вчера у Новим Садзе отримал схадзку з представителями одборох за образованє националних совитох (НС) националних меншинох, пре потримовку проєкту „На моїм язику – нєформалне образованє за крочай блїжей ґу роботи”. Проєкт з нєформалним образованьом ма облапиц младих, з увагу и на чувствительни ґрупи, котри ше школую на мацеринским язику и унапрямиц их ґу будуцому занїманю пре доставанє роботи.
Представителє одборох, медзи нїма и предсидателька Одбору за образованє НС Руснацох Мелания Римар, дали потримовку проєкту, а на схадзки бешедоване и о сотруднїцтве НС и ГФ „Панония” у обласци потримовки младим, а окреме о заєднїцкей роботи на унапредзованю образованя на меншинских язикох у Войводини.
Граждански фонд „Панония” поволує припаднїкох рускей, мадярскей, горватскей, румунскей, ромскей и словацкей националней заєднїци до 25 роки, котри маю закончену штредню, висшу, лєбо високу школу, най ше приявя на пейцдньову програму за едукаторох (тренинґ за тренерох), з тему приступанє на тарґовище роботи.
Обука будзе у октобру, а потим млади на мацеринским язику буду отримовац роботнї и едукациї о спомнутей теми у висших класох основних и штреднїх школох у хторих ше наставу отримує на язикох националних меншинох.
Активованє на волонтерскей основи, а приявиц ше мож найпознєйше по 30. септембер. Условия за конкурованє и формулари мож найсц на сайту https://www.panfond.org/main.php?lang=sr&p=novosti