ВУКОВАР – У просторийох Союзу Русинох Републики Горватскей у Вуковаре всоботу, 19. децембра, отримана програма на хторей нашо млади з Войводини младим з Вуковару, Осиєку и Петровцох, як и другим присутним, представели системски орґанизовану роботу младих Руснацох у Войводини, пре витворйованє сотруднїцтва медзи нашима младима з тих двох державох.
Присутних привитала подпредсидателька Координациї радох Рускей националней меншини Републики Горватскей (Координация) Агнетка Балатинац, а на програми векшином були млади, члени нєдавно основаного Клубу младих при Координациї. Клуб младих основани по углядзе на нашо Роботне цело за младеж Националного совиту (НС) Руснацох, о хторим з тей нагоди бешедовал його предсидатель Саша Сабадош.
Сабадош представел и роботу Заводу за културу войводянских Руснацох (ВР) и Виглєдовацкого кругу, док мастер професор руского язика и литератури и студентка докторских студийох Ана Римар присутних детальнєйше упознала з Одсеком за русинистику Филозофского факултету у Новим Садзе.
О роботи младежского здруженя „Pact Ruthenorum” бешедовал його предсидатель Яким Винаї, а лидер Медзинародного волонтерского кампу Иван Канюх, през интеракцию з присутнима младима представел Камп, наглашуюци же на нїм можу участвовац и млади Руснаци з Горватскей.
О младежским часопису „МАК” бешедовала його редакторка Мая Зазуляк и поволала младих на сотруднїцтво, док свойо авторски композициї по руски виведли Сашо Палєнкаш и Михаил Рамач, котри пречитал и стихи зоз своєй кнїжки поезиї.
И по урядовей програми госци и домашнї бешедовали о представених активносцох и можлївосцох за медзисобне сотруднїцтво, а млади з Горватскей ше найбаржей заинтересовали за участвованє на Волонтерским кампу, на „Дньовки”, та и за приход на Младежски бал до Керестура.
Одход наших младих до Вуковару орґанизовали Роботне цело за младеж НС и Завод за културу ВР, у рамикох медзинародного сотруднїцтва з Руснацами з вонка Сербиї, а запровадзене є на основи Протоколу о сотруднїцтве медзи НС Руснацох и Координацию радох Рускей националней меншини у Горватскей.
