ДЮРДЬОВ – На нєдзелю, 8. марца, почина ярня часц першенства у Подручней лиґи Нови Сад, а фодбалере першого тима дюрдьовского Фодбалского клуба „Бачка 1923” буду бавиц перше змаганє процив ФК „Индекс” зоз Нового Саду.
Новосадски клуб по законченю єшеньскей часи першенства на таблїчки завжал друге место з 42 бодами, цо вельо вецей од дюрдьовскей Бачки котра мала дзеветнац боди и завжала дванасте место од осемнац клубох.
– Индекс моцна екипа, алє обчекуєм побиду, бо бавиме на домашнїм терену. Нам кажда побида барз вельо значи. Маме чежки розпорядок, а побида на першим змаганю би нам дала инерцию – гварел тренер першого тима ФК„Бачка 1923” Раденко Шарович.
Змаганє на нєдзелю почнє на 15,30 годзин на стадиону у Дюрдьове.