РУСКИ КЕРЕСТУР – Дводньова Мултимедиялна манифестация младих „Дньовка” будзе того викенду, 20. и 21. новембра у Доме култури Руски Керестур, а у рамикох Културней манифестациї „Костельникова єшень”. На тогорочней 18. Манифестациї млади ше представя з промоцию нових композицийох, виставу фотоґрафийох, виводзеньом музичних точкох, интерпретованьом прози и танцом.
На пияток, 20. новембра на 21 годзин у Билей („Дядьовей”) сали Дому култури будзе промоция компакт-диску „Лєм єден погляд” Златка Русковския, хтори вишол з остатнїм числом часопису МАК. Исти вечар будзе и означованє 10 рокох младежскей емисиї „Останьце нашмеяни” Радио Нового Саду и єй презентованє младим.
Други дзень Манифестациї, на соботу, на 18 годзин у голу Дому култури шицки заинтересовани годни опатриц виставу фотоґрафийох з тогорочного конкурсу з тему „Контраст”. На вистави буду виложени 25 вибрани фотоґрафиї, а три найлєпши исти вечар буду преглашени на главней програми „Дньовки”.
На соботу на 20 годзин у Велькей сали дому култури на главней програми „Дньовки” наступя нашо млади музичаре, танєчнїки и писателє, векшина уж познати публики, а дзепоєдни дебитанти.
Отримованє Мултимедиялней манифестациї младих „Дньовка” финансую Завод за културу войводянских Руснацох, Национални совит Руснацох и Месна заєднїца Руски Керестур, а орґанизована є з потримовку Дому култури Руски Керестур, РНТ „Петро Ризнич Дядя” и НВУ „Руске слово”. Главни орґанизатор Манифестациї Здруженє младих „Пакт Рутенорум”.