НОВИ САД – У Новим Садзе вчера, 6. децембра, отримани вецей збуваня у рамикох манифестациї Днї Миколи М. Кочиша, хтору орґанизує Дружтво за руски язик, литературу и културу (Дружтво).
Перше у просторийох Руского културного центру отримана схадзка Управного одбору, а потим и порядна Скупштини Дружтва. У звиту о тогорочней роботи, хтори поднєсла секретар Дружтва Ирина Папуґа, медзи иншим визначене же Дружтво було орґанизатор вецей як 70 манифестацийох, стретнуцох, литературних вечарох, та змаганьох з руского язика и Стретнуца руских школох. Дружтво ше и у тим року закладало за виучованє руского язика, та є на штредньошколским ступню орґанизоване у Новим Садзе и Шидзе, а руски язик виучую и новосадски дзеци на предшколским уровню у ПУ„Радосне дзецинство”, у оддзелєню „Палчочка”.
Обчекує ше виходзенє 21. числа виданя Дружтва „Студия Рутеника”, у орґанизациї Дружтва отримани вецей промоциї кнїжкох хторе обявело у 2015. року, отримана 12. Подобова колония „Стретнуце у Боднарова” у Ґосподїнцох, додзелєни порядни награди Дружтва, а план роботи за идуци рок подобни як тогорочни и, як поведзене, його витворенє будзе завишиц и од прилїву средствох.
У финансийним звиту на Скупштини Дружтва поведзене же у 2015. року Дружтво розполагало з 578 000 динари, хтори достати од компетентних републичних и покраїнских орґанох, локалних самоуправох и донацийох. Найвецей пенєжи за свою активносц Дружтво достало од Покраїнского секретарияту за образованє, предписаня, управу и национални меншини-заєднїци, Покраїнского секретарияту за културу и явне информованє, Општини Жабель и Националного совиту Руснацох. За идуци рок плановане розполагац з милион 220 000 динари.
У першей часци Скупштини заслужним поєдинцом додзелєни припознаня за 2016. рок и отворена вистава малюнкох хтори настали на прешлорочней Колониї „Стретнуце у Боднарова”, а з минуту цихосци дата почесц покойним членом и почитовательом Дружтва.
У рамикох Дньох Миколи М. Кочиша у Доме школярох „Бранково коло” у Новим Садзе позавчером, 5. децембра, отримана годзина руского язика, на хторей школяре штреднїх школох котри виучую руски язик пречитали даскельо писнї Миколи Кочиша и здогадли ше на ньго през биоґрафски податки и його творчосц.
