НОВИ САД – Вчера у просторийох Заводу за културу войводянских Руснацох, з нагоди означованя 50-рочнїци „Литературного слова”, додатку новинох „Руске слово”, отримане литературне стретнуце, ткв. литературни „feedback” форум.
У першей часци стретнуца представени два мастер-роботи – Александра Мудрия „Польодїлска лексика Руснацох у Войводини” и Андреї Медєши „Ґерманизми у руским язику”.
Друга часц була отвореного типу, дзе млади писателє мали нагоду представиц свою творчосц и розправяц нє лєм о власних, алє и о роботох своїх колеґох, з намиру же би ше достала повратна информация, т.є. „feedback”.
Отворена и тема о проблематики и нєшкайшим стану у литератури Руснацох, и заключене же треба стимуловац младих за писанє, алє и оможлївиц им же би свою творчосц могли указац. За тото, як поведзене, нєобходне пестовац и нє занєдзбовац литературну критику, бо на тот способ автор и його творчосц замерковани.
Литературни форум орґанизовали Завод за културу вийводянских Руснацох и Виглєдовацки круг, а обидва мастер-роботи публиковани у Едициї иновациї „Владимир Ґарянски”, по конкурсу хтори розписал Завод за културу войводянских Руснацох.