КОЦУР – Вчера, 31. мая, у Коцуре порушана акция збераня подписох за подношенє петициї же би ше коцурски пияц врацело под управу Месней заєднїци Коцур.
Най здогаднєме, прешлого пиятку, 24. мая, управянє зоз пияцом у Коцуре превжал ЯКП ,,Комуналєц” зоз Вербасу.
Як гваря жителє Коцура, нєзадовольни зоз тоту одлуку, цени по хторих мож закупиц простор на пияцу звекшани зоз 1 500 динари на 12 000 динари на рочним уровню, а дньова пиячарина зоз 100 динари звекшана на 350 динари, и по їх словох то превелька цена як за продуковательох, так и за тарґовцох. Иснує можлївосц же би пияц у Коцуре цалком остал без тарґовцох пре нєвигодни условия, так заключели Коцурци.
Шицки котри жадаю потримац тоту акцию и дац свой подпис, можу то зробиц кажди дзень у центру валала, при Зоранови Стоисавлєвичови, хтори там предава желєнаву. А будзе орґанизоване зберанє подписох по обисцох по цалим валалє, так же и на тот способ кажде хто зосце годзен дац потримовку. Од документох потребна лєм особна карточка.