Петро Яринчик нови предсидатель „Младих Русинох”

автор рсф/зам
913 Опатрене

МАЛИ ЛИПНИК (СЛОВАЦКА) – Початком того мешаца, на Скупштини Младежскей орґанизациї „Млади Русини”, зоз шедзиском у Братислави, место дотерашнього предсидателя и снователя тей орґанизациї Петра Штефаняка, за предсидателя вибрани Петро Яринчик.

Штефанякови на Скупштини придата „Почесна награда за длугорочну роботу на розвою младежи русинского народа”. Орґанизация „Млади Русини” службено основана 2008. року у Братислави, а свойо месни орґанизациї ма и у Нїтри, Кошицох и Старей Любовнї. Штефаняк бул снователь и Фолклорного ансамблу „Рутения”, Радия „Русин фм”, як и других проєктох у напраме орґанизованя и зазберованя младих Русинох у Словацкей.

Орґанизация соснователь и член Шветового форуму русинскей младежи, на чиїм чолє велї роки бул Мартин Караш, як представитель „Младих Русинох”. Тиж так, основала и Центер младих Русинох, як центер културного живота младих Русинох котри жию, лєбо ше школую у Братислави.

Попри нового предсидателя Петра Яринчика (зоз Шамброну), на Скупштини вибране и нове руководительство Младежскей орґанизациї „Млади Русини”.

ПОВЯЗАНИ ТЕКСТИ