НОВИ САД/КОЦУР – Традицийне покраїнске припознанє ,,Таланти” талантованим школяром з Войводини и їх ментором уручене стреду, 11. децембра, у голу Покраїнскей влади у Новим Саду.
Припознаня достал вкупно 171 школяр и їх менторе у основних, стреднїх и музичних школох. Вони у школским 2018/2019. року посцигли визначни резултати на републичних змаганьох у жеми и иножемстве у обласцох науки, технїки, уметносци и язика.
Медзи школярами котри достали припознаня и пенєжни награди були и бувши школярки Основней школи ,,Братство єдинство” з Коцура Наташа Тамаш и Катарина Кулич, як и їх наставнїци Снежана Шанта и Бояна Петрович. Награди достали за посцигнути резултати на Републичним змаганю зоз руского язика и сербского як нємацеринского язика.
Припознаня им уручел подпредсидатель Покраїнскей влади Дьордє Миличевич вєдно зоз покраїнским секретаром за спорт и младих Владимиром Батезом и покраїнским секретаром за културу, явне информованє и одношеня з вирскима заєднїцами Драґану Милошевич.