ОСИЄК (ГОРВАТСКА) – Културно-уметнїцке дружтво (КУД) Руснацох Осиєк внєдзелю, 4. децембра, у своїх просторийох отримало порядну Виберанкову и звитодавну скупштину, на хторей вибране и нове руководительство КУД.
Звит о роботи КУД Руснацох Осиєк, у хторим поведзене же робели хорска, тамбурова и подобово-етно секция, поднєсла його предсидателька Агнетка Балатинац. У звиту поведзене и же даскельо члени КУД того року були у Мукачове, у України, а шицки секциї наступели у Шидзе, у Лєтнєй владическей резиденциї, на поволанку шидского пароха о. Михайла Режака.
Дружтво орґанизовало и свою традицийну манифестацию „Дравски габи”, Подобову колонию медзинародного характеру, як и интерни Мемориялни турнир у столним тенису „Владимир Тимко”, а того року отримана и промоция кнїжки „Страданє Руснацох у Отечественей войни 1991./92.” Миколу Папа.
У звиту визначене и добре сотруднїцтво зоз Союзом Русинох РГ, дзе КУД Руснацох Осиєк член од самого снованя, а прейґ Представительки рускей националней меншини Осєцко-бараньскей жупаниї Агнетки Балатинац и з Националним Совитом Руснацох у Сербиї.
Финансийни звит поднєсла касир Лела Дїтко, звит Надпатрацого одбору Дубравка Рашлянин, а на Скупштини прилапени и плани роботи и финансийох за идуци рок.
До нового Предсидательства КУД на Скупштини вибрани Татяна Миклош, Зденко Сивч, Хелена Тимко, Лела Дїтко, Дубравка Рашлянин, Мирко Рибич и Блаженка Будимчич, а на Предсидательстве за предсидательку КУД вибрана Татяна Миклош, за подпредсидателя Зденко Сивч, за секретара Хелена Тимко, а за касира Лела Дїтко.
До Надпатрацого одбору КУД вибрани Зденка Зрно, Хелена Шобан и Владимир Еделински.
Дотерашня предсидателька КУД Руснацох Осиєк Агнетка Балатинац подзековала шицким на сотруднїцтве у прешлим мандату, а новому руководительству пожадала успишну роботу.
