У Кули отворени Младежски клуб

автор зам
704 Опатрене

КУЛА – У Кули вовторок, 1. децембра, отворени Младежски клуб за роботу и рижни активносци младих у кулскей општини. Младежски клуб отворени и ушорени дзекуюци окремному проєкту за тоту намену, хтори финансовало Министерство за спорт и младеж, а запровадзела го Канцелария за младих Општини Кула.

Як на його отвераню гварела координаторка Канцелариї за младих Єлена Миличевич, Клуб у подполносци опремени зоз сучасну технїчну опрему и ма шицки условия за запровадзованє рижних активносцох, як цо то информованє младих, нєформалне образованє, едукативни роботнї, културни активносци, кариєрне совитованє и други програми младих.

Проєкт „Опреманє Младежского клубу” у складзе з Националну стратеґиї за младих на уровню держави и Локалним акцийним планом за младих Општини Кула.

Младежски клуб ше находзи на углє Ленїновей и улїци Св. Марковича, у дакедишнїх просторийох СОФК-и и КПЗ, коло Шах-клубу, на дреси Ленїнова 5.

ПОВЯЗАНИ ТЕКСТИ