НОВИ САД – Треце тогорочне число новинох „Руске слово” покус шветочне, бо ше з написами пририхтуєме за преславу Националного швета Руснацох.
Слово нашим читачом, алє и шицким Руснацом з нагоди швета, упутел предсидатель Националного совиту Руснацох Борислав Сакач, потим Йоаким Рац, директор Дома Култури котри домашнї Централней преслави у Руским Керестуре и Велибор Милоїчич, предсидатель Дочасового орґану Општини Кула.
„Тижньовнїк” пише и о Жимскей школи руского язика у Земплинскей Теплици на котрей були маломатуранти керестурскей Школи, а „Нашо места” информую кельо з буджету Општини Кула предвидзене за укладаня до Руского Керестура. Ту звит и зоз схадзки Совиту Месней заєднїци Дюрдьов и Скупштини општини Шид.
„Духовни живот” зазначел акцию гуманитарни полудзенок у дюрдьовским КУД „Тарас Шевченко” и дзелєнє гуманитарних пакецикох любови у Новим Вербаше.
„Култура и просвита” у розгварки з подобовим уметнїком Владом Нярадийом дава його огляднуце на прешли рок, а мож пречитац и як дюрдьовски фолклораше пририхтую нови хореоґрафиї. Ту и звит зоз Новорочного концерта у Жаблю.
„Економия” пише о туризму и початку роботи Локалней акцийней ґрупи у Кули, а о роботи електричара бешедовал майстор Микола Мики Сакач з Коцура.
На бокох рубрики „Людзе, роки, живот” представяме новоформоване Здруженє женох „Маря” у Шидзе котре роби у рамикох КПД „Дюра Киш”, а читачох упознаваме зоз Таню Оросову з Руского Керестура и Ана Марию Ивков зоз Французкей.
На „Спорту” пише о новоотвореней спортскей гали у Ґосподїнцох, о роботи мини рукометней секциї у керестурскей Школи и Рочней скупштини Карате клубу „Русин”.