НОВИ САД – У просторийох Руского културного центру (РКЦ) у Новим Садзе, всоботу, 22. фебруара, отримани бал Дружтва.
Руски бал у Новим Садзе, за хтори ше указало же було вельо заинтересованих, отворел предсидатель Управного одбору РКЦ Славко Винаї и привитал присутних медзи хторима було и вецей ґенерациї госцох.
Добре розположенє на такволаним Руским балу правел „Пицикато бенд”, а вешелєло ше од 19 годзин, та до позних годзинох.
Окрем членох Руского културного центру, госцох було и зоз других местох дзе жию Руснаци, алє и члени СКЦ „Павел Йозеф Шафарик” з Нового Саду.
Нащивителє на балу ше забавели и зоз томболу за хтору ше остарали орґанизаторе балу – Йовґен Мудри и Иван Канюх. Награди на томболи були интересантни и рижнородни, а перша и найвреднєйша томбола була сучасни телевизор и пошла до Руского Керестура.