НОВИ САД – Додзелєни награди школяром и ментором зоз АП Войводини у рамикох програми „Таланти 2024”. Медзи наградзенима школярами и Соня Надрлянски и Алекса Бокан з Нового Саду, хтори достали тоту награду за посцигнути успих на змаганю з руского язика.
Найуспишнєйшим школяром и їх ментором зоз териториї АП Войводини за вершински резултати яки посцигли на змаганьох у жеми и иножемстве у обласци науки, технїки, уметносци и язика у школским 2023/2024. року, покраїнски секретар за спорт и младих Дане Баста уручел, вчера 20. децембра, награди и похвалнїци.
Дипломи за посцигнути вершински резултати на змаганю зоз обласци руски язик додзелєни Сонї Надрлянски зоз Основней школи при ґимназиї „Йован Йованович Змай” и Алексови Бокан зоз Основней школи „Коста Трифкович” обидвойо зоз Нового Саду, тиж и їх менторки Ана-Мариї Рац.
Шицкого додзелєни седем специялни награди талантованим школяром, 96 дипломи и пенєжни награди школяром и ментором. Зоз обласци язикох додзелєни 12 награди, а од тих дванац два за руски язик. Награди достали и три школски оркестри и хор, а уручени и 312 похвали.
