Прешли ище єдни „Мелодиї Руского двору”, и знова указали же тот фестивал тамбурових оркестрох з наших местох оддавна зажил нє лєм у рускей култури и музики у Сриме, алє и ширше дзе жию Руснаци, бо шицки дзечнє приходза до Шиду. На тогорочни 19. по шоре, одволали ше и наступели, окрем домашнїх и орґанизатора КПД „Дюра Киш”, ище седем оркестри и то зоз Руского Керестура, Вербасу, Дюрдьова, Кули, Вуковару и Петровцох, як и оркестер Горватского дружтва зоз Шиду. Порихтали ше добре указац инструментални композициї, алє и крашнє зашпивац чи як солисти, або у дуету, а публика уживала и з аплаузами их наградзовала.
Фестивал ознова бул змагательного характеру (а знало ше случиц же даєден рок бул лєм ревиялни) и того року орґанизаторе вибрали добре ришенє, та место фаховей комисиї и публики обовязно, гласала лєм публика хтора вибрала побиднїка. Було на концу „досц цесно”, єден глас пресудел, цо гутори же наисце було з чого виберац.
И того року фестивал мал провадзаци змисти и то етно штанди здруженя женох хтори були виложени у порти , а у будинку Лєтней владическей резиденциї була отворена и красна вистава малюнкох малярки Андєлки Античевич зоз Беркасова цо шицко вєдно фестивалу дало єдну заокружену и цалосну форму у пестованю рускей култури и традициї.
Фестивал бул добре орґанизовани, були задовольни и госци и домашнї, а то потвердзує и друженє у Руским доме после вечери кед ше и заграло и зашпивало. На концу остава повесц же нє важне хто победзи, алє хто участвує и хто люби присц до Шиду, з наших местох з обидвох бокох гранїци. Фестивал прешол, а уж ше роздумує о тим 20. ювилейним, хтори будзе нарок. Гоч орґанизаторе барз добре свидоми своїх можлївосцох, цо и кельо можу, заш лєм єст тварда дзека же би „Мелодиї Руского двору” на рок достойно означели свой красни ювилей.