5. ОКТОБЕР – На нєшкайши дзень народзени етномузиколоґ и композитор Онуфрий Тимко (1908–1989)
1713 – Народзел ше филозоф и писатель Денис Дидро (Ланґр, Французка 5. октобер 1713 – Париз, 31. юлий 1784), критичар релиґийного моралу и ношитель просвитительскей думки у предреволуцийней Французкей, инспиратор и главни редактор велькей французкей Енцикопедиї у 28 томох.
1857 – Маляр Стеван Тодорович, пионир физичней култури у Сербиї, отворел у Беоґрадзе безплатну школу за мальованє, шпиванє и ґимнастику.
1864 – Народзел ше хемичар и индустриялєц Луй Жан Лимиєр (Безансон, Французка, 5. октобер 1864 – Бандол, Французка, 6. юний 1948), пионир шветовей кинематоґрафиї.
1908 – Народзел ше священїк, науковец, етномузиколоґ и композитор Онуфрий Тимко (Коцур, 5. октобер 1908 – Вербас, 24. авґуст 1989), зазберовал народни шпиванки, бул и историчар и публицист. Основну школу закончел у Коцуре, до ґимназиї Онуфрий Тимко ходзел у Вербаше и Травнику. Богословию започал студирац на Теолоґийним факултету у Заґребе, а закончел у Львове (Україна). За паноца бул пошвецени 1934. року у Заґребе, службовал у Руским Керестуре, Лишнї (Босна), Баня Луки, Коцуре и у Старим Вербаше. НВУ Руске слово видало його кнїжки Мали соловей – писнї за дзеци зоз нотним материялом, Шпиваночки мойо, Наша писня 1, Наша писня 2, Наша писня 3, Наша лирика и Наша писня – интеґралне виданє кнїжкох 1 до 3, зоз преушорену нотну часцу и штварту кнїжку як новим додатком. Бул член Союзу фолклористох Югославиї и участвовал у роботи його конґресох. На каждим зоз нїх мал науково сообщенє котре познєйше друковане у урядових виданьох. Його роботи обявени у часопису Шветлосц, Народним календаре, як и у вецей виданьох Матици сербскей. Онуфрий Тимко умар у Вербаше 24. авґуста 1989. року, поховани є на вербаским теметове.
1969 – БиБиСи емитовал першу епизоду сериї Лєтаци циркус Монтия Пайтона, котра постала култна емисия ширцом швета.
1983 – Лидер польского руху Солидарносц, Лех Валенса, достал Нобелову награду за мир.
2000 – До Беоґраду пришли демонстранти, велї були зоз нушаньосци Сербиї, у нєпреглядних конвойох камионох, автобусох и автох, котри полиция нє могла застановиц зоз блокаду драгох – звалєли режим Слободана Милошевича, котри поражени на виберанкох 11 днї пред тим. На вецей местох у центре городу полицає ше престали одуперац демонстрантом, а войско нє интервеновало. Истого дня у вечарших годзинох зоз тераси Скупштини Беоґраду ґу гражданом ше озвал вибрани предсидатель Югославиї Воїслав Коштуница.
Нєшка Шветови дзень учительох (World Teachers’ Day), преглашел го УНЕСКО (United Nations Educational, Scientific and Cultural Organization).