Дарко Михайловски зоз Дюрдьова, пре витирвалосц и упартосц єденасти рок зашором пестує желєняву, а дзекуюци добрей инфраструктури и знаню у орґанизованю роботи, успишни є и у продукциї и пласману. Того року на польох мал огурки – корнишони, паприґу и цибулю. Сезона обераня огуркох закончена влєце, паприґу ище вше обераю, а цибулю тераз пакую, одкладаю, або предаваю. Найвекшу часц одкладаю до маґазину за предай на жиму, кед єй цена, як рахує, будзе векша.
– На цибулї ше зявели хороти, алє ми их, на щесце, нє маме, а то так, медзи иншим, и прето же нїхто нє пестує цибулю блїзко при нашей. Почитуєм плодоряд и цибулю нє садзим рок за роком на истей жеми. Барз сом задовольни як вона того року випатра, здрава є, велька, тварда, ма свою лупу, нє ма додатни пах, ма фурму и фарбу – шицко одличне. Пестуєме вецей файти цибулї, гевту котра нє може длуго стац зме уж и попредали, а тоту котра за одкладанє, пакуєме, одношиме до маґазину. Кед шицко так як треба, вец цена цибулї рошнє кажди тидзень, тераз є коло трицец, а наздаваме ше же коло Нового року будзе коло штерацец-пейдзешат динари, та ше виплаци чувац ю. А чувац мож лєм добру и здраву цибулю – гварел Дарко Михайловски, польопривреднїк з Дюрдьова, хтори у тей роботи вєдно з фамелию, а найвекшу потримовку и помоц ма од супруги Даниєли и трох синох – Марка, Милоша и Луки. Михайловсково обрабяю коло осемдзешат ланци зоз желєняву, а найвецей маю цибулї котри садза два раз до рока. У тей хвильки маю и цибулю котра тераз сходзи и поряднє ю залїваю. Вибераю ю на початку юния, предаваю ю по авґуст, бо нє може длуго стац, найдлужей мешац, або два. Другу цибулю садза у марцу, починаю ю виберац од авґуста, а може стац по април, або май шлїдуюцого року, и то праве тоту котру тераз пакую, предаваю и одкладаю. Маю ю на 35 ланцох, а гевту цо прежимює маю на дванац ланцох.
– Нє знам чом у нашим валалє людзе нє ховаю желєняву, єст барз мало продуковательох. Окрем нас, вецей нїхто нє ма цибулї, паприґу пестую троме ґаздове и то на даскельо ланцох, ґереґи тиж нєт вельо, а праве Дюрдьов бул познати по желєняви, окреме по парадичох и ґереґох. Правда же робота чежка, алє и тото же з тей роботи мож крашнє жиц кед ше добре роби. Важне мац добру орґанизацию и помоц, алє дакеди и щесца. Пред двома, або трома роками зме цибулю мушели заорац, бо було барз вельо дижджу, так же на ризик треба раховац, алє то нє вше так, бо ше уж други рок утрати надополнї, лєм треба буц витирвали – гварел Дарко хтори того року подло прешол зоз паприґу, бо мало кошта, а наднїци драги.
Залївали дзень, а ноц
Паприґу на велько предаваю по 60 динари, нє пакую ю, алє ю предаваю на полним прикочу такой з поля, та купец сортира и предава далєй. Перша класа паприґи кошта 100 до 120 динари за килу, а друга 35 динари и ю найчастейше предаваю до фабрики.
– Кед предаваме на прикочу, єдноставнєйше нам, вецей у тим „ланцу” шицки заробя, а и нам, заш лєм, єдноставнєйше и лєпше. Наднїчаре за годзину обераня паприґи достаню 500 динари, а пред двома-трома роками доставали 300 динари, алє теди паприґа вецей коштала. Цибулю углавним предаваме на велько, а купци приходза з Беоґраду, Нового Пазару, Сараєва и других местох. Предаваме и накупцом, алє вони барз подценюю нашу роботу, уложени пенєж и труд. На пияцу цибуля кошта 50-60 динари, а накупцом вельо кед им понукаме по 30 динари – гварел Дарко котри додал же ше цибулю муши поряднє допатрац, а кед сухо як цо остатнї роки, муши ше ю нєпреривно залївац. Наш собешеднїк гвари же цибулю звичайно залїваю три аґреґати, а того року 48 днї, дзень, а и вноци було уключене залїванє, и вельо требало укладац до горива котре, по його думаню, алє и велїх польопривреднїкох, єдна з векших ставкох у продукциї.
Одкупйоваче збиваю цену
Михайловсково на польох маю обичну и лилову (червену) цибулю, билу вецей нє пестую, бо ю купци нє барз глєдаю, алє и прето же урожай менши и нє може длуго стац. Обична цибуля ма цмейшу лупу, твардейша є, мож ю зберац з комбайном, одпорнєйша є, та ю и лєгчейше паковац, а червена драгша, муши ше ю з руку винїмац и кажде вдеренє на нєй видно. Лилову маю лєм на даскельо ланцох, бо уж маю з ню искуства, и нє предава ше ю вельо и пре цену, бо кед чарна трицец динари, лилова кошта пейдзешат. Цибулю предаваю и векшим ланцом котри желєняву пласую до супермаркетох.
– Мам упечаток же ше векши одкупйоваче и тоти цо желєнаву даваю до векших супермаркетох, здружели и нє сцу нам дац лєпшу цену, алє ю нєпреривно збиваю. Голєм тото мож видзиц, бо, наприклад, у дутянох дзе ю вони доручую, цибуля кошта 59-60 динари, вецей як динар на динар заробя – гварел Дарко котрому сезона желєняви почина першого априла, а закончує ше концом новембра. Дньово маю и по штерацец анґажованих наднїчарох з валалу, або приходза орґанизовано зоз Банату. Цибулю од хоротох защицує раз до тижня, трипс барз заступени, як и уши и кревосокопийци, а велї препарати процив нїх забранєне хасновац. Цибулю ше муши поряднє плєц, а прикарму окончую прейґ системи „капка по капка” скоро кажди дзень.
– Того року зме нє мали крадзи, алє було и так же нам украдли акумулатор з аґреґатох, або паприґу з поля. У Ґосподїнцох ше, наприклад, часто краднє гориво зоз аґреґатох и то нєприємни ситуациї. Та, заш лєм, думам же пестовац лєм житарки нє вредзи, ми их маме на полю пре потреби почитованя плодоряду желєняви. Плануєме и рихтаме жем даскельо роки напредок, и барз меркуєме зоз чим пред тим пирскане и цо на каждей жеми росло. Думам же барз важне знац у яким стану жем же би на нєй була добра и здрава цибуля, паприґи, або огурки. Думам же вельки ризик нєшка вжац жем под аренду и ховац на нєй желєняву, а нє знац у яким є стану – прешвечени польопривреднїк Дарко, котри обачел же у желєняви найвекши проблем трипс котри постал одпорни на препарати, алє ище вше нєт таки препарат котри го може цалком викоренїц. Тоти цо давали добри ефект, забранєне хасновац, а нови нєт.
Векшина будзе предавац аж на жиму
