Находзиме ше у предвиберанковим периодзе кед медийни и явни простор полни зоз рижнима виявами,
коментарами, експертскима и „експертскима” оценами, становисками и проґнозами, та и зоз менєй, лєбо вецей дефинованима планскима документами учашнїкох на виберанкох
У тей предвиберанковей кампанї, гоч вона на самим початку, уж досцигнути високи ступень конфузиї, у хторей и добре упутеним нє ясне хто ше зач заклада и цо планує робиц после виберанкох кед освої власц, лєбо кед достанє можлївосц же би партциповал у новей власци.
Як випатра, постої можлївосц же би ше после виберанкох у нашим дружтве пременєли велї ствари. Зоз тима пременками би ше могло елиминовац дотерашнї нєправилносци и нєзаконїтосци у функционованю институцийох, волунтаризем и самоволю ношительох власци на шицких уровньох, криминал и корупцию, алє и пременїц модел дружтвеней орґанизациї, ступень централизациї у велїх обласцох, концепцию привредного розвою, конфузни реґионални розвой хтори прави огромни демоґрафски проблеми у цалей держави. Тиж привредну структуру и одношенє держави спрам аґроиндустрийней продукциї и домашнїх подприємствох и инвестицийох до їх вельо швидшого розвою, и виправиц вельо того цо ше за остатнї вецей як 10 роки указало як слабосц, деформация, лєбо проблем. Попри тим, видзи ше же будзе нєобходно елиминовац дотерашнє кокетованє зоз придружованьом ґу Европи и националнима интересами и суверенизмом хтори го онєможлївює, и направиц дефинитивни вибор.
Здобува ше упечаток же вецейрочна активносц студентского руху ошлєбодзела у явносци критичну масу политичних и фахових моцох, яка нєобходна за заобраценє у дружтвено-економским розвою. Кед же то наисце так, леґитимне уж тераз поставиц питанє цо приоритетни активносци котри нєобходно превжац такой после виберанкох, швидко и ефикасно, без огляду на рижнородносц вибраней векшини хтора будзе формовац Скупштину, виберац Владу и окончовац власц. Рядошлїд активносцох ше практично сам наруцує. Треба цо скорей поробиц найменєй шлїдуюце:
Нєобходне, насампредз, вибрац Владу компетентних фаховцох, способних же би ше такой, без вельких пририхтованьох лапели до огромней роботи хтора их чека;
Утвердзиц стварни стан явних финансийох, обсяг и структуру явних приходох хтори формую постояци инструменти од локалних, до державних орґанох, обсяг и структуру розходох и кредитней задлуженосци держави, городох, општинох и шицких явних подприємствох;
Такой пририхтац и принєсц предписаня за реорґанизацию и кадрову обнову правосудних орґанох на шицких уровньох, министерства нукашнїх дїлох и службох безпечносци, и шицко цо скорей запровадзиц до пракси, и положиц до функциї елиминованя криминала и корупциї и врацаня безправно здобутого маєтку;
Направиц фундаменталну ревизию явних проєктох на уровню держави, Покраїни Войводини, шицких городох и општинох;
Превипитац стан у вельких явних подприємствох, принєсц план потребних мирох консолидациї и хитно их реорґанизовац и оспособиц за ефикасне функционованє;
Анализовац стан у розвою науки и технолоґийох на универзитетох, факултетох, у институтох и у других институцийох, и превжац енерґични мири на ревитализациї науковей роботи и на посцигованю векших резултатох домашнєй науки;
Анализовац стан и функционалносц городох и општинох, и окончиц реорґанизацию и рационализацию локалних самоуправох;
Превжац мири на отвераню процеса пременки привредней структури, потримовки домашнїм подприємством, политики реґионалного розвою и пременїц одношенє держави ґу розвою польопривреди и вкупней аґроиндустрийней продукциї и руралного розвою, як условийох за швидши розвой Републики Сербиї и за єй демоґрафску обнову;
Утвердзиц стварни стан у здравственей защити и принєсц ускладзени план розвою основней и здравственей защити на висшим и на найвисшим уровню;
Анализовац стан од основношколского до универзитетского образованя и цалу образовну систему у держави, и направиц конзистентни план за ефикасне возпоставянє сучасней и ефикасней образовней системи у Републики Сербиї.