Зоз початком нового школского року, у Основней и штреднєй школи зоз домом школярох „Петро Кузмяк” у Руским Керестуре, робиц почало и предлужене пребуванє. Слово о файти воспитно-образовней орґанизованей роботи зоз школярами першей и другей класи основней школи, хтора им понука помоц коло ученя, а занятим родичом безпечни простор за свойо дзеци хтори нє кошта нїч.
Понеже у тим школским року до першей класи уписани аж три оддзелєня, а капацитет у предлуженим пребуваню 28 дзеци, интересованє за упис було вельо векше. Но, з оглядом на тото же предлужене пребуванє нє обовязне и нє шицки школяре ходза поряднє, праве прето за каждого школяра ше вше найдзе места. Зоз першокласнїками роби учитель Деян Будински, док за школярох другей класи задлужена учителька Тамара Штранґар. Кажде оддзелєнє ма свою учальню и програму прилагодзену ґу їх возросту, а кажди учитель „випровадза” свою ґенерацию.
Орґанизация пребуваня прилагодзена ґу роботному часу родичох и розпорядку настави. Кед школяре наставу маю пополадню, до предлуженого пребуваня можу присц рано. Перши термин од 7:15 по 8 годзин, або други од 9:30 по 10 годзин. Кед школяре наставу маю пред поладньом, до предлуженого пребуваня приходза после настави, односно коло 11:30 годзин.
Школяре у предлуженим пребуваню маю обезпечени и полудзенок, за хтори плаца 390 динари и то єдини їх трошок. Родичи ше каждей нєдзелї прейґ Вибер ґрупи вияшнюю чи їх дзецко у наиходзацим тижню будзе хасновац школску кухню чи полудзенок принєше з дому.
За школярох першей класи, окреме у першим полрочю, концепт предлуженого пребуваня кус отворенши, та ше през дзень зменюю и ученє, и бавенє. Дзеци робя домашнї задатки, алє маю досц простору и за бависко и друженє. При старших, школярох другей класи, вецей часу пошвецене ученю и роботи „опрез табли”, понеже зоз їх возростом рошнє и количество школских обовязкох.
– Маме наисце рижни активносци. Дзеци любя кед означуєме даяки медзинародни дзень, маме розгварку на тоту тему, о тим направиме и пано, прикрашуєме гол. Дакеди маме рижни спортски бависка, правиме квизи, преславиме и родзени дзень и вец себе дзеци винчую, шпиваю, дакус ше и почасциме, алє приоритет нам вше поробиц домашнї, повториц за контролни, або даяки диктат. Пре тот швидки темпо живота думам же родичом предлужене пребуванє барз велька помоц, гоч, по моїм думаню, кед ше сце ище вецей, треба школяре и дома же би ше учели – гвари учителька Тамара Штранґарова, а визначує и виволаня хтори тота робота ноши:
– То досц зложена робота, понеже дзеци маю рижнородни задатки од трох розличних учителькох. Нє кажде у истим моменту дава исти задатки, або ше нє чита исту приповедку. Тиж, нє кажде дзецко ма исти темпо ученя, нє шицки єднак заинтересовани, та треба тому шицкому знац вибачиц шора.
Того року першираз як учитель, у предлуженим пребуваню, роби и учитель Деян Будински, хтори пред тим вецей роки робел як тренер атлетики, та му робота з дзецми нє нєпозната:
– Рушел сом од того же знам робиц зоз дзецми, лєм же розлика у тим же у спорту треба дзеци порушац же би бежали, скакали, бавели ше, а то лєгко, бо то дзецом природне. Док у школи треба учиц, та ту уж дзецко треба змириц, за цо цалком други приступ и треба мац и иншаки метод у роботи. Меням и я тактики, преучуєм цо лєпше, а идуци крочай будзе научиц дзеци же би були дакус цихши, же би одкладали бависка за собу и даяки основни ствари. Но, я задовольни як рушело, а зоз дзецми любим робиц, та проблеми нє будзе – гвари учитель Деян Будински.
За родичох предлужене пребуванє вельо вецей як лєм практичне ришенє за час док су на роботи. Воно им дава и сиґурносц же дзеци на безпечним, же маю помоц коло школских обовязкох и же час препровадзую квалитетно, у дружтве своїх парнякох.
Най здогаднєме, предлужене пребуванє ма традицию длугшу од 20 рокох, з тим же дакеди исновало и за школярох трецей и штвартей класи. Праве прето велї родичи думаю же би було добре врациц старосну гранїцу дзецох у пребуваню, же би вона була голєм по трецу класу.
Дзеци безпечни и анґажовани, а родичи на мире
