КУЛА – На площи опрез главней Пошти, всоботу 9. октобра, отримани сход Студентскей лїстини – Студенти победзую на хторей бешедовал студент модератор, а тиж представени и двойо кандидати зоз лїстини.
Єдна зоз кандидатох була доцентка Будовательного факултету у Беоґрадзе Саня Фриц, хтора поручела же ше вона занїма зоз транспортну инфраструктуру и додала же то єден зоз явних интересох, алє же приоритет може достац лєм аж теди кед ше гражданом сполнї основне людске право и потреба, а то право на воду за пице. Вона визначела же гражданє анї у єдним зоз населєних местох у општини Кула нє маю воду за пице у 21. вику и додала же ше планує формованє нєзависних комисийох хтори випитаю шицки инвестициї и направя явно доступну базу же би гражданє могли видзиц як ше хасную буджетски средства.
Други кандидат бул професор Економского факултету у Беоґрадзе Деян Шошкич, хтори поручел же пришол час же би ше, як гварел, застановело понїжованє гражданох и же пришол час же би ше од нормалней роботи могло нормално жиц. Вон додал же Сербия нє худобна жем, алє є анї нє пребогата та кед ше заведзе шор и кед нє будзе корупциї на шицких уровньох пенєжу будзе вецей як цо ше дума. Сербия заслужує вецей и зоз тим будзе лєпше шицким – визначел Шошкич, цо поздравели даскельо стотки присутни гражданє.
Всоботу у Кули могло видзиц и вельке число полициї у полней опреми, хтори у двох кордонох роздвоєли студентски сход и сход прихильнїкох лїстини Зєдинєна Сербия, хтори ше источашнє находзели под даскелїма шатрами на початку велького парку зоз улїци Маршала Тита.
