ВЕРБАС – Всоботу у Готелу „Бачка” у Вербаше отримани традицийни, 25. Бал КПД „Карпати”, хтори того року потримал и Национални совит Руснацох.
Бал отворели предсидатель и подпредсидателька Дружтва др Деян Загорянски и Єлена Кузма, а нащивительох привитал и предсидатель Националного совиту Руснацох Славко Рац. Рацови на Балє др Загорянски придал и Плакету, як найвисше припознанє хторе додзелює Скупштина Дружтва „Карпати”.
– Понеже зме ту мали успишну преславу Националного швета, то на даяки способ и награда Вербащаном же би бул домашнї тому балу, же бизме ше ище раз повешелєли. Можебуц ше Вербас укаже як лєпша локация за Централни бал, понеже є велїм блїжей – гварел Рац.
На 25. Балє була орґанизована богата томбола, а главну награду, хтору спонзоровало Дружтво Карпати” – путованє до Будапешту за два особи на три днї, достали Зденка и Юлин Фейсово з Вербасу. Попри тим, були и други вредни награди, як цо то малюнки уметнїкох Владу Нярадия, Ґорани Бильня и Кристини Ґшвенґ, шицких з Вербасу, судзина „Металац” и велї други.
Прейґ 200 госци з велїх наших местох – Дюрдьова, Шиду, Нового Саду, Коцура, Керестура, Кули, медзи нїма було и надосц младих, на уходзе привитани з хлєбом, грали гудаци з Вербасу и Руского Керестура, шпивали Мирослава Даждиу и Саня Полдруги, а попри вечери и томболи, орґанизовани и бависка нєсподзиваня.
Орґанизованє Балу и награди за томболи помогли велї спонзоре и приятелє, медзи нїма Национални совит Руснацох, Завод за културу войводянских Руснацох, Завод за учебнїки Беоґрад, НВУ „Руске слово”, НВУ „Ридне слово”, КПД „Карпати” и други поєдинци и подприємства.
