Студентски блокади у Сербиї, котри настали як резултат траґедиї на Желєзнїцкей станїци у Новим Садзе кед спадла стреха и настрадали 15 особи, то нє цошка нове у студентским орґанизованю за остатнї сто роки. Медзитим, вшелїяк же то наймасовнєйши протести ище од 1936. року, кед як и тераз, шицки универзитетити ступели до блокадох и штрайку, теди процив фашизациї, нєшка процив корупциї и нєодвичательносци державних институцийох котри ше олєгко одноша ґу шмерци 15 особох.
Источашнє, то першираз у остатнїх сто рокох орґанизованя студентских блокадох и протестох же студенти одбиваю кажду повязаносц зоз политичнима странками и нєвладовима орґанизациями. Явни наступи студенткох и студентох нє нєполитични, анї ше нє оградзую од политики, свидоми су же їх дїлованє политичне, алє, наглашую же нє и странкове.
На єден способ, студентске орґанизованє котре тирва уж два и пол мешаци, то у сущносци акумулованє искуствох студентских орґанизованьох ище од блокадох 1992. року котри були орґанизовани процив войни и власци Слободана Милошевича, студентских шейтаньох 1996/97. року процив покраднутих виберанкох, та зоз 2011, 2017. и 2019. року. Студенти нєшка комбиную блокади факултетох зоз протестами на улїчкох, превжали идеї пленумох, нєгиєрархийного орґанизованя (як на протестох 2011), а гражданє их потримую прето же су дзеци.
Тото остатнє новина у студентским дїйствованю. Ґу студентом ше приключело и значне число штреднїх школох. Єден спомедзи транспарентох на протестох глашел – Дзецинска револуция, источашнє студенти направели видео знїмок у котрим поручую „бабом и дїдом” же би ше нє старали, же су нє гладни и смиядни, и же професоре меркую на нїх. Студенти прешпивали и дзецинску писню Заклео се бумбар, так же бумбар заменєли зоз студент.
Тот иншаки сензибилитет котри обачлїви у студентских протестох 2023/24 можебуц и початок воздзвигованя, условно поведзено, нового политичного субєкта до политичного швета – дзеци. Попри тим, постої и якаш паралела зоз историю женского руху, зоз їх освойованьом позициї политичного субєкту, уношенє нового сензибилитету до патриярхалного швета (векшина социялних питаньох з котрима ше держава нєшка занїма, то резултат женского руху). Женски рух допринєсол же ше политика занїма зоз чловекову чувствительносцу – бриґа о дзецох, о старих, о здравю, та и о образованю за шицких (нє лєм за привилеґовани класи).
И, можебуцпатриме як ше дзеци, потераз вязани за вираз „жени и дзеци”, одвоюю до самостойного субєкту, з котрого би можебуц могли настац нови дружтвени одношеня, у котрих ше бависко и креативносц, резервовани у историї цивилизациї лєм за польо уметносци, врацаю ґу чловекови як його родзене место. Прето же, чловек настал зоз бависка, а нє зоз роботи, так утвердзела антрополоґия.
На концу, ясне же студентски блокади, сами по себе, нє можу принєсц озбильну пременку (того свидоми и сами студенти), алє таке масовне уношенє дзецинского сензибилитету до политики, длугорочно будзе мушиц мац ефекту.
Становиска у тим тексту виключно авторово и нє вше одражую ушорйовацку политику новинох „Руске слово”.