Христос раждаєтся!

автор Владика Георгий Джуджар
134 Опатрене

У нєшкайших, нєлєгких обставинох ознова чуєме слова котри приноша вистку ангела Господнього: „Нависцуєм вам вельку радосц, котра будзе цалому народу. Нєшка ше вам у Давидовим городу народзел Спаситель, котри Христос, Господь” (Лк. 2, 11).

Нєшка Предвични Бог бере на себе людске цело, Син Божи постава сином людским, котри сходзи з нєба на жем вжац на себе шицку терху людскей гришносци и оздравиц ю. 

Нєшка у образу Дзецочка, котре спочива у бидних  яшелькох, ми зоз очми вири видзиме того, хто пошвидко воскрешнє з мертвих, знїщи адову силу, надвлада шмерц и принєше швету безконєчну пасхалну радосц. Нєшка Син Божи дарує людзом надїю на спашенє од вичней препасци.

Ми кажди рок у молитвох споминаме подїю Христового Рождества, котру предвидзели и нависцовали пророки и обчековал старозавитни Израїл. Велї поколєня ше наздавали на приход Христа Месиї. У чаше длугокого обчекованя шицки людзе  глїбоко чувствовали жаль за страценим райом, и рихтали ше до приходу свойого Спасителя. „А кед пришла полнота часу, послал Бог Сина свойого, родзеного од жени, родзеного под Законом, же би одкупел тих цо под Законом, же бизме прияли посиновенє” (Гал. 4, 4-5).

 Таки успишни конєц старозавитного обчекованя учи нас же бизме ше нє розчаровйовали, алє зоз виру и надїю ишли напредок аж до сполнєня Божей обецунки, гоч нє раз нашо жемски животни драги зацмени зоз виволанями, през котри ше нам видзи же до нас нє доходзи зарйочка Божей любови. Бог вше вирни своїм обецунком.

Ангелски слова: „Слава на висотох Богу, а на жеми мир, людзом котрих вон люби” (Лк. 2, 14), нависцую найвекше чудо – уцеловенє Бога до чловека, Створителя – до створеня; то чудо котре надвишело аж и вельке дїло створеня швета зоз нїчого.

Прето приход Спасителя значи початок новей епохи у историї чловечества.

Стари Завит бул союз Бога зоз вибраним народом, а Рождество Христово – то швето котре ше одноши на кажду людску особу гоч якей култури, народу, або социялней припадносци.

Нашо преславйованє Рождества Христового – то нє лєм обичне предлуженє традициї, або часц церковного календара. Рождество Христово – то швето безконєчней Божей любови до людского створеня, то швето сполнєня надїї людства, котру нє можу знїщиц нїяки почежкосци и спокуси. 

Дакеди нам приходза подозривосци же чом у цихей ноци Рождества Христового ангели шпиваю о мире, кед цихосц велїх ноцох роздзераю детонациї телїх експлозийох по швеце. Ми знаме же мир на жеми завиши од мира у души каждей людскей особи, од чистоти шерца и жертвового служеня Правди. Нємир и войну приноши грих, цо преступенє Божих Заповидох – нарушованє Божей гармонії. Ангели шпиваю о тим мире за котри ше ми модлїме на наших богослуженьох: „За мир з висот и спашенє душох наших Господу помолимся”. Таки мир принєсол на жем Єдинородни Син Божи – Вон жридло и податель правдивого миру.

Ми, стояци на боку Правди и Божих Заповидох, одвитуєме на шицки почежкосци и спокуси зоз словами пророка: „Задумуйце задумки, та вони ше нє сполня, наказуйце, та вони ше нє збуду, бо з нами Бог!” (Ис. 8,10).

Христос пришол на тот швет, алє нє шицки го прияли, и по нєшка Ирод глєда „дзецочко же би го забиц” (Мт. 2,13). И у наших часох присутна тенденция виганяня Христа зоз особного и явного живота. Сучасни людзе часто жию так як кед би нє було приходу Спасителя, алє подїя Рождества нас учи же попри шицких намаганьох Ирода и його слугох, а тиж и их нашлїднїкох, нєможлїве знїщиц вельки дар спашеня людства.

„Ми преживюєме тоту подїю як радосц поцешеня за гришних людзох, и як радосц усвидоменя же зме нє забути и нє одруцени од Бога; преживюєме ю як радосц стретнуца зоз тим, котри утре кажду слизу з наших очох и шмерци вецей нє будзе, анї смутку, анї болю вецей нє будзе…” (Одкр. 21, 4).

 Преживююци радосц Рождества, постарайме ше указац помоц и тим котрим то потребне; наполнїц зоз шветлом и з радосцу живота осамених, засмуцених и хорих.

Радосц Христового Рождества най ошвицує наш жемски живот. З Божим благословом розпочнїме 2025. Нови святи ювилейни рок, котри нас поволує застановиц ше над своїм животом, над його вредносцами и над нашим одношеньом з Богом. Най нам тот рок будзе рок Божого благослову хтори принєше духовни благодатї и позитивни пременки у нашим живоце.

Жичим радосни и благословени швета Рождества Христового!

              ХРИСТОС РАЖДАЄТСЯ! СЛАВИТЕ ЄГО!

              + Георгий Джуджар

              Владика

ПОВЯЗАНИ ТЕКСТИ