РУСКИ КЕРСТУР – Тих дньох у Руским Керестуре замерковане же ознова була розкопана Русинска улїца, у часци од центру спрам Крущичу, после менєй як рока одкеди реконструкция драги у тей часци улїци закончена и отворена за транспорт.
Як могло обачиц, Русинска улїца даскельо днї розкопана на вецей местох алє лєм по штредку драги.
Понеже „Рутенпресˮ нє могол дойсц до урядових информацийох од компетентних о спомнутих роботох, нєурядово дознаваме же ше реконструкцию роби лєм по штредку асфалта и лєм местами, там дзе асфалт препада, а як потолковане, препада пре слабше поробени штредок асфалту, за розлику од бочного, кед ше робело преширйованє драги на виходу з Керестура спрам Крущичу.
Очкодованю драги, як ище нєурядово визначене за „Рутенпресˮ, найвецей допринєсло вельке количество води хтора ше на тим месце збера, превозки понад 5 тони хтори тамадз транспортую, алє и нєдостаток финансийох же би ше роботу лєпше поробело.
