КОЦУР – У рамикох културней манифестациї „Ноц музейох”, у Етно клубу „Одняте од забуца” у Коцуре, пияток 15. мая, отримана промоция кнїжки за дзеци „Заграда”.
Спред орґанизатора присутних привитала и през програму водзела предсидателька Етно клубу „Одняте од забуца” Аранка Медєши, а о самим виданю бешедовала авторка Даниела Тамаш, хтора тиж и пречитала даскельо писнї. Публику з векшого творели дзеци, хтори активно участвовали у програми, алє и їх родичи, як и баби и дїдове.
Дзеци зоз КУД „Жатва” одшпивали и єдну народну шпиванку „Зламала ше кормань деска”, за хтору их пририхтали Марко Буила и Марина Тодич. На концу, авторка подаровала кнїжки коцурским установом: Дзецинскей заградки „Герлїчка”, Основней школи „Братство єдинство”, Народней библиотеки „Данило Киш” и Етно клубу „Одняте од забуца”, а шицки нащивителє того вечара могли купиц сликовнїци „Заграда” и „Ремесла” по промотивней цени 500 динари.
Сликовнїца „Заграда”, у виданю НВУ „Руске слово”, вишла у марцу того року у едициї „Заградка”. Авторка кнїжки Даниела Тамаш, а розкошни илустрациї зробела Александра Русковски.
Манифестацию „Ноц музейох” урядово потримали Општина Вербас и Туристична орґанизация Вербас.
