Руснаци у Канади найприроднєйша вяза з Руснацами у Войводини и прето з нїма треба вибудовац нови моцни мости.
Ювилей 80-рочнїца Новинско-видавательней установи „Руске слово” нагода же би ше подцагло смужку, здогадло на прешлосц и попатрело до будучносци.
Цали 2025. рок будзе у знаку трох мотивох – мостох, маґиї и економиї. Идземе шором: НВУ „Руске слово” уж други рок рихта проєкт публикацию зоз Саскачеванским дружтвом рускей култури з Канади, котре тиж преслави ювилей – 20 роки од снованя. У роботи з нїма, почувствовали зме кельо то вредни, борбени и упарти людзе же би дошли до своїх цильох. Живот у емиґрациї их на тото научел. А найважнєйше – упарти були же би зачували руски идентитет и културу и представели ю явносци. Здогадли ме на наших предкох, котри у гевтим чаше пред трома виками шмело рушели на долню жем Габзбурґскей монархиї…
Руснаци у Канади найприроднєйша вяза з Руснацами у Войводини и прето з нїма треба вибудовац нови моцни мости. Вони державянє Канади и з велькей часци державянє Републики Сербиї, прето су аж и леґални информативни и културни простор на котри ше НВУ „Руске слово” може прешириц. Руснаци у Саскачевану глєдали од нас помоц и ми им дали руку. Порихтани зме ище баржей им помагац, же би, док иниституцийно змоцня – вец могли нам помогнуц у тераз уж, за нїх, „старим краю”.
Гоч нам приоритет друковане слово, будучносц информованя у онлайн змистох, котри уж прейґ сайту „Руского слова” пласуєме до швета. Прето нам єдного дня попис у Сербиї нє будзе релевантни, алє кельо ше нам уда на дружтвених мрежох коло змистох и институцийох позберац Руснацох на шицких континентох.
Маґия. НВУ „Руске слово” на конкурсу Буджетского фонду за национални меншини Министерства за людски и мешински права и дружтвени диялоґ Републики Сербиї достало финансийну потримовку за повторене виданє познатей кнїжки сказкох за дзеци „Воденїчка на стриберним потоку”, автора Мирона Будинския. „Руске слово” у поради зоз фамелию Мирона Будинския рихта репринт „Воденїчки”, кнїжки котра у ориґиналу вишла 1970. року, а на котрей одрастали ґенерациї. Унука Мирона Будинския, Лара Петкович, роби на сучасних илустрацийох до кнїжки, а уж презентована радио-драма за приповедку „Воденїчка на стриберним потоку”, котру реализовал тим Руского културного центру з нового Саду и НВУ „Руске слово” з финансийну потримовку Заводу за културу войводянских Руснацох.
Маґични швет сказкох Мирона Будинския ознова виходзи кед є найпотребнєйши, у чаше кед и одроснутим хиби сон о лєпшим швеце, а вони треба же би приповедки надїї пренєсли своїм дзецом. У проєкту задумане же би ше даскельо приповедки преложело по сербски и же би ше их на интеркултуралних роботньох читало у вецейязичних штредкох дзе жию Руснаци. Задумане же би ше уметносц и литературу представело як живи орґанизем, котри зоз пестованьом рошнє, а учашнїки роботньох после пречитаних приповедкох посадза рошлїнки и буду провадзиц їх розвой.
Литература и змисти за дзеци уж шести рок приоритет НВУ „Руске слово”, а „Воденїчка на стриберним потоку”, зоз роботну теку будзе 30. видата кнїжка за дзеци од аж 85 кнїжкох котри у тим периодзе вишли.
Економия. Динар би вше требал буц на першим месце. Бо, без нього чежко финансовац информованє и видавательство. Обласц информованя у „Руским слове” углавним покриє Република Сербия, алє видавательство и други потреби за национални меншини обично финансую матични держави. З оглядом на тото же у рускей заєднїци нє иснує консензус у вязи матичней дежави(вох), шицко ше муши створиц з власнима моцами.
НВУ „Руске слово” прилапело таку реалносц и уж шейсц спомнути роки кнїжки финансує зоз своїх моцох, дзекуюци помоци донаторох, спонзорох, проєктох, а найвецей гражданох котри купую кнїжки и зоз тим финансую обявйованє нових. Иснує вельке интересованє за кнїжку по руски, окреме за сликовнїци за дзеци. Алє и вше векши потреби змистох по руски, та ше у тим року ювилею осем деценийох муши озбильно роздумац як посцигнуц финансийну самоотримуюцосц. Просто поведзено, кед ше и далєй сце мац сликовнїци за 250 дин, новини за 50 дин, а „Рутенпрес” задармо, хтошка тото муши финансовац.
На концу, НВУ „Руске слово” ма потребу орґанизовац векши простор у Руским Керестуре, нє лєм за канцелариї, алє и за кнїжкарню и промоциї наших виданьох. Подобне би требало зробиц и у Новим Садзе. Просто поведзено, у Руским Керестуре нєрухомосци подрaгшели и тераз нє маме достаточно средства за хижу. О тих и других фахових питаньох будземе урядово дискутовац з нагоди 80-рочнїци. Чекаме на вашо поради и вашу помоц.