Означени Дзень општини Кула

автор А. Медєши, фото: Д. Барна
297 Опатрене

КУЛА – У шветочней сали Скупштини општини Кула вчера отримана шветочни коктел з нагоди Дня општини на хторим присуствовали заняти у Општинскей управи, як и директоре и представнїки явних институцийох и установох у општини Кула.

Присутних привитал предсидатель општини Кула Дамян Милянич, хтори своїм гражданом винчовал Дзень општини и визначел же тот рок означели огромни инфраструктурни проєкти, алє и велї други менши проєкти, єднак важни за гражданох, прешвечени же у наиходзацих рокох у кулскей општини будзе ище вецей инвестициї хтори пред тим нє були реализовани.

Од спомнутих то – драга Сивец – Стапар, нови мост хтори направени на Траси 1 хтори ше реконструує, а вредносц тих роботох прейґ милиярду динари.

Од роботох хтори ше у тей хвильки реализує то драга Керестур – Крущич, ту и початок роботох на драги Кула – Червинка – Сивец, як и вельо менши проєкти хтори реализовани у цеку того року – нови бавилїща за дзеци, ушорйованє спортских галох, ушорйованє Дому здравя у Червинки, асфалтованє улїцох.

Од векших проєктох Милянич визначел нову Полицийну станїцу, а од децембра наявел отверанє новей станїци за Професийну огньогасну єдинку. У новембру би требали почац роботи и на реконструкциї бувшей полицийней станїци, гварел вон, дзе будзе музей, библиотека, сучасна читальня и отворена лєтна бина.

На концу, предсидатель наявел и нови инфраструктурни проєкти у Кули и Червинки.

ПОВЯЗАНИ ТЕКСТИ