Два роки зволаня Националного совиту за нами, права нагода спатриц активносци и резултати роботи одборох и самого Националного совиту. Пошвеценосц и одвичательносц у роботи членох НС як и членох одборох и роботних целох була на високим уровню, док резултати часто нє завишели лєм од нашей упартосци алє и од велїх других обставинох
У Коцуре робиме на формованю рускей воспитней ґрупи по возросту а нє по язику, цо нам закон допущує, а єст и добра дзека родичох. Єдине препреченє то нєдостаток простору. Обецане з боку локалней управи и руководства установи же тот проблем будзе ришени. Подобна ситуация и у Дюрдьове. На нас ше стої же бизме були упарти и вимагали ришеня тих проблемох.
Дзекуюци анґажованю Координациї НС, конєчно ше почали друковац учебнїки и по руски, як за поряду наставу так и за виборну. Зоз министерства сцигли и обецунки же таки проблеми, яки були у друкованю учебнїкох на меншинских язикох, вецей нє буду.
Конєчно ше нам поспишело, после упартей роботи велїх особох и зоз помоцу Школскей управи Сомбор ознова порушац виборну наставу по руски у Суботици. Остава нам упарто робиц на уписованю школярох до руских одзелєньох у Коцуре и Дюрдьове, до рускей ґимназиї у Керестуре и на Оддзелєнє за русинистику Филозофского факултета у Новим Садзе. Идуцого року пред нами ище єден значни ювилей хтори треба достоїнствено означиц, а то 260. роки образованя по руски у Коцуре.
Одбор за културу того року треба же би спатрел резултати применьованя Правилнїка о подручних канцеларийох, и активносцох истих. По моїм думаню, а и думаню других членох НС Правилнїк дава видлїви резултати, окреме у роботи наших КУД и участвованю на наших фестивалох. И того року опредзелєни средства за присуствованє руководительох зоз наших дружтвох на рижних семинарох у обласци култури.
Одбор за информованє прешлого року почал зоз знїманьом подкастох зоз рижних обласцох, а концом рока на їх предкладанє помогнуте нашим редакцийом зоз нєобходну опрему за роботу. Найзначнєйши проблем то кадрово проблеми у наших редакцийох, РТВ-а пре огранїчованє запошльованя О тим проблему я бешедовал на вецей заводи зоз одвичательнима особами, дзе догварени и конкретни крочаї на ришованю того проблему.
Нови млади моци у Одбору за службене хаснованє язика и писма, одвичательно робели у тей обласци. Окончени анкети у шицких локалних управох о випольньованю законских предписаньох, евидентую ше погришни надписи по руски и виправяю зоз ресорнима орґанами.
Треба надпомнуц и похвалїц роботу Роботного цела за младеж. Млади моци ше одвичательно анґажую та видлїви и резултати. Тиж так НС ма добре одношенє зоз Роботним целом за науку, котре ше анґажує у своїм дїлокругу активносцох кед же то потребне.
Национални совит и його члени зоз одвичательну роботу здобул угляд и уважованє у шицких локалних управох дзе присутни припаднїки нашей заєднїци и при ношительох найодвичательнєйших функцийох на державним уровню.
Окремна увага анґажованя у наступним периодзе, треба же би були активносци на упису до ОВС и на шлїдуюцим Попису. Найвекша активносц будзе на одборох и роботних целох як и на самим Националним совиту, а по моїм думаню нємерлїва помоц на тим задатку будзе и на самих подручних канцеларийох. Правда же Попис ище далєко, алє кед ше нє будземе на час анґажовац, най нас вец нє чудую резултати, бо теди будзе позно.
Думам же Национални совит ма моци зочовац ше зоз шицкима проблемами, алє потребна нам и помоц шицких других котрим руски национални идетитет и интерес у першим плану. Бо кед єст добрей дзеки, кед почитуєме єдни других, кед ше водзи конструктивни диялоґ и чераю идеї, вец муша буц и резултати.
З тим наздаваньом шицким Руснацом и Рускиньом, як и шицким добрим людзом з котрима вєдно жиєме и робиме, винчуєм наиходзаце Националне швето Руснацох.