БИКИЧ – На швето Сошествиє Святого Духа, познатше як Русадля отримана традицийна 13. културна манифестация „Пришли нам Русадля“ у орґанизациї КПД „Иван Котляревски“.
И з тей нагоди вецей здруженя женох з подруча општини Шид порихтали етно столи опрез будинка основней школи.
Шветочни концерт отримани у сали Дома култури хтора була прикрашена з конарами лїпи и квецом, а концерт отворели наймладши члени КПД „Иван Котляревски“ зоз традицийну шпиванку „Русадля, Русадля“.
Концерт бул преткани зоз шпиванку и танцами, а окрем домашнїх хтори ше представели зоз шпиванками и танцами, наступели и госци зоз КУД „Яким Гарди“ зоз Петровцох и „Осиф Костельнїк“ зоз Вуковару хтори тиж шпивали и танцовали.
Шветочносц була нагода придац и подзекованя хтори спред Здруженя женох „Бикичанки“ придала предсидателька Невенка Бобаль, а спред КПД „Иван Котляревски“ предсидатель Деян Бобаль.
После концерту ше шпивало и танцовало коло „майового древа“ хторе було опрез Етно хижи, потим го леґинє зоз шекеру и зрубали, а друженє предлужене на коктелу.
