КУЛА – Роботи на асфалтованю у Улїци Дюри Струґара у Кули, почали штредком януара, а нєдавно виняти бетонски плочи на драги, место хторих будзе поробене асфалтованє.
Окрем драги, асфалтовани буду и места за паркиранє у тей часци улїци, а заменєна будзе и гидрантска мрежа. Покля тирваю роботи, улїца будзе заварта за транспорт, а то перша фаза у реконструкциї парку. У тей першей фази виняти лавочки хтори после репарациї буду покладзени на преход коло беґелю, винаята и стара фонтана як и часц дражки.
У другей фази роботох, у марцу, будзе преширени парк по Улїцу Маршала Тита, будзе положене бавилїще за дзеци зоз тартан подлогу у парку дзе тераз бетонска площа (споза трафики). Положи ше нову фонтану, нови дражки за пешакох, а планує ше и прешириц желєни поверхносци у парку.
Менше число стеблох будзе заменєне, а о каждим стеблу поєдинєчно, о його здравственим стану, буду одлучовац фахово особи, явносц и служби з општини, наявюю компетентни за локални медиї. Хори стебла буду зачерани зоз другима стеблами, чия старосц од 5 по 7 роки, хтори високи найменєй два метери, а по принципе – єдно старе стебло ше зачера за три нови, у парку або у його околїску, на явней поверхносци.
Цали парк будзе мац нове ошвиценє, зачерану инсталацию – воду, канализацию, струю.., автоматску систему за залїванє, як и софтверске провадзенє у яким стану желєнїдла.
Средства за спомнути проєкт ушореня парку зоз вибудовом фонтани, реконструкцию часци улїци Дюри Струґара и реконструкцию часци явней поверхносци у улїци Маршала Тита у Кули, виноша 162.976.000 динари, од хторих Кула обезпечела 4.518.000 динари, а зоз висших ступньох власци обезпечене 158.458.000 динари.
Проєкт, як и контракт зоз подробносцами коло окончованя тих роботох, стої на сайту Општини Кула од децембра и доступни є онлайн.
