Суша зменшала урожай

автор вл. дїтко
548 Опатрене

Остатнї роки заградкарска продукция за тих хтори продукую желєняву за свойо потреби у загради, на отвореним, а нє у пластенїкох, досц очежана пре пременлїву и нєвигодну хвилю. Праве таки обставини пановали и тей яри, та кед слово о заградкарстве, продукция цибулї и цеску подруцела.

Андєлка Михняк зоз Шиду штредком юлия повиберала цибулю и цеснок и гвари же є нєзадовольна з урожайом у одношеню на предходни роки. У марцу посадзела два килоґрами чарней и килоґрам червеней, такволаней лиловей цибулї.

– Цибуля добре зишла и на початку була красна. Дзивка Йолана ю опирскала процив цибульового хробака и випатрало же будзе добри урожай. Медзитим, пришлa сушa и цибуля яґод же станула у розвою. Горучава и нєдостаток влаги єй нє одвитовали. Кед пришла половка юлия, веґетация престала и нє було потреби же би и далєй була у жеми, та сом ю повиберала – гвари Андєлка Михняк.

Гвари нам же ю очисцела, односно орезала пирка и у ґайбочкох тримала дзень-два на слунку и потим ю одложела на пойд, як и каждого року. Наша собешеднїца додава же предходних рокох мала єшеньску цибулю, алє нє була задовольна як зродзела и вец одлучела садзиц ю вяри. Тиж нам гвари же мала дакус єшеньского цеску, добре же так, бо ярнї цеснок бул досц подли.

Душанка Лазич

Андєлка Михняк

Подобну приповедку о продукциї цеску зме чули и од Душанки Лазич, тиж зоз Шиду. Вона гвари же цеснок нє зродзел як обчековала, тиж пре сушу, а тото цо зродзело благочасово повиберала зоз жеми. Лазичову зме застали праве як з цеску плєце венчики.

– Ище як дзивче сом ше припатрала як моя баба плєце венчики з цеску и вона ме научела як ше то роби, так же го я заплєцем, венчики повишам и так ше цеснок добре отрима през рок. Цеснок садзим у своєй загради и часто го хаснуєм за пририхтованє єдлох як здраву присмачку – гварела нам Душанка Лазич.

ПОВЯЗАНИ ТЕКСТИ