На початку зме ище єдного календарского року и весело зме дочекали його приход. Нє знаме цо нам принєше, окреме же знаме же войни, хтори ше преляли и до того року, кельо ґод су далєко, охабяю пошлїдки и на нас шицких. Забриґовани зме и за економску ситуацию, бо ше вше чежше жиє, кризи вше глїбши.
Тераз кед зме уж преславели и швето Христового народзеня, Крачун, и по новим и по старим календаре, опрез нас Националне швето Руснацох, хторе означуєме од 2008. року, а того року го преславиме у Сримскей Митровици.
Швето вше виход зоз рутини, шицки нам мили ту, рукуєме ше, обочкуєме и жичиме доброго здравя, щесца, любови и успиху… И так почина наша занєшеносц ґу чловечеству взагалї, хторе, вшелїяк церпи и од нєуклопеносцох, нєскладаня, проблемох, войнох, алє без огляду и на тото, ми ше позберали преславиц швето. Швето вше полне радосци, дружтвена и тїлесна госцина, вельо єдзеня и вельо бешеди. Заслужели зме тото торжество, бо у живоце було вельо понагляня, вистатосци, почежкосци, та и розчарованя, а вироятно же того будзе ище, бо живот нє совершени.
Нажаль, українски и палестински народ нє мал тот комфор преславиц швета у мире зоз своїма найблїзшима, бо воєни конфликти ше нїяк нє закончую, а велї и страцели дакого з найблїзших. То нє єдини народи хтори у швеце препровадзели швета у воєних зраженьох, конфликтох и проблемох, алє о тих войнох нам сцигую информациї.
Нови рок тирва уж тидзень и еуфория покус нєстала, помали ше врацаме до реалносци. А реалносц нє така швицаца як лампочки на крачунским древку. Тото цо нє розришене у прешлим року, будзе ше мушиц розришиц у тим. Студентски блокади ше предлужели и у тим року. Вимоги студентох зоз явним писмом потримало коло 4000 универзитетских професорох. „Почитовани гражданки и гражданє Сербиї, ми, наставнїки, сотруднїки и виглєдоваче универзитетох ширцом Сербиї одлучно стоїме зоз своїма студентами у заєднїцкей борби за лєпше дружтво”, поручели професоре.
Представнїки штирох репрезентативних синдикатох у просвити предлужую розгварки зоз Владу Сербиї и обчекую конструктивни розгварки зоз премиєром Милошом Вучевичом, як и конкретни понукнуца. Просвитни роботнїки буду инсистовац на почитованю Протокола хтори подписани ище у октобру 2023. року, а хтори предвидзує виєдначенє початней плаци у просвити зоз просекову плацу у Сербиї. Тото треба же би було применєне уж од 1. януара у тим року. И то нєшка наша реалносц и нашо проблеми хтори чекаю на розришенє.
У року пред нами наша Установа означи свою 80-рочнїцу од снованя. З оглядом на тото же зме влонї означели 100-рочнїцу руского друкованого новинарства, красни ювилеї ше буду шоровац и у тим року пред нами. На нас же бизме их святочно означели и здогадли ше на шицких тих хтори пред нами охабели глїбоки фундаменти на хторих ми нєшка будуєме. Руски идентитет ше зачувал три вики ту, на тей долнєй жеми, у тей ровнїни, у Войводини и Панониї дзе ше нашо предки добродзечно приселєли. Най би ище тирвал виками.
ruske.redaktorka@gmail.com