Прешли три роки як почала война у України, а числа хтори описую тоту войну требало би повторйовац и о нїх роздумовац. Тоти числа нє лєм статистика, алє здогаднїк на злодїйства нєвидзеного обсягу хтори ше случую пред нашима очми. Прето би требала буц обовязка каждого чловека же би на тото здогадовал кажди дзень себе и других, же би таки злодїйства нє постали рутина, прилапююца и повторлїва, цо циль шицких аґресорох на швеце.
Треца рочнїца од початку русийскей инвазиї на Україну окреме чежка Українцом, бо одкеди ше оглашели перши сирени, до нєшка нє уцихли. Алє тота рочнїца дакус иншака од предходних, бо ше на медзинародним планє, як и у самей України, вше вецей бешедує же 2025. рок будзе гевтот у котрим ше тота война закончи, або ше голєм посцигнє примирє.
За розлику од предходних рокох, кед ше бешедовало лєм о оружию и кеди воно сцигнє, того року ше бешедує о тим чи Україна вообще будзе мац место за столом дзе ше ришує о єй дальшей судьби. Тото пошвидшало и вецей анґажовало европских лидерох же би завжали напрям у розгваркох о примирю.
У Києву отримани Самит пошвецени означованю трирочнїци од початку войни у України, хтори предсидатель Зеленски наволал як преобраценє. На нїм участвовали 37 держави и їх лидере, од котрих 13 були присутни, медзи котрима и Урсула фон дер Лаєн, предсидателька Европскей комисиї, а гевта друга часц ше уключела онлайн.
Знаме же ше на медзинародним планє досц того пременєло зоз позициї америцкей администрациї з нововибраним предсидательом Доналдом Трампом спрам Русиї и спрам України, и як би требал випатрац мир медзи Русию и Україну. У України ше бешедує же войну треба закончиц, на цо порихтани єй гражданє хтори вистати и вичерпани у тих трох рокох войни, алє су нє порихтани пристац на шицко лєм же би до мира пришло. Америка инсистує на догварки зоз котру би експлоатовала т. є. брала приходи з експлоатациї природних ресурсох України, нє лєм ридких металох, алє и ґазу, нафти, приходи зоз пристанїщох и другей инфраструктури. Предсидатель Зеленски виявел же є порихтани на догварку, алє нє подпише нїч цо би значело же дзешец ґенерациї Українцох буду тото плациц.
Война у України нє лєм же пременєла европску безпечносну архитектуру, алє и уплївовала на глїбшу интеґрацию України до европских охранєбних структурох. Заєднїцки проєкти у продукованю воєней опреми, уключуюци дрони и артилєрию, змоцнюю охранєбни капацитети восточней Европи. Гоч членство України у НАТО-у и надалєй нєизвесне, ЕУ дава длугорочни воєни финансийни ґаранциї зоз чим змоцнює свою безпечносц.
Вшелїяк, нє треба забуц же на початку своєй нєзависносци Україна 1994. року верела своїм союзнїком и партнером. Теди придате нуклеарне наоружанє Русиї, а Меморандум зоз Будапешту ґарантовал нєзависносц и териториялни интеґритет України хтори подписали пейц жеми, уключуюци Русию, ЗАД, Французку, Вельку Британию и Китай.
ruske.redaktorka@gmail.com