СЕРБИЯ – Вецей як трицец державни факултети на штирох Универзитетох у Сербиї у блокади.
Основни заєднїцки вимоги студентох же би ше обявело комплетну документацию о реконструкциї Желєзнїцкей станїци Нови Сад, як и политичну и виновну одвичательносц особох хтори одвичательни за траґедию, процесуованє одвичательних за напад на студентох, професорох, школярох и гражданох на протестох,..
Преподаваня, вежби, колоквиюми и испити як и шицки наставни активносци обуставени до дальнього. На факултет студенти можу войсц зоз индексом.
Блокаду започали ище 25. новембра студенти Факултета драмских уметносцох у Беоґрадзе. Вони ше одлучели на таки крочай, як гварели, прето же их орґанизована ґрупа нападла на наявеним сходу кед давали почесц настрадалим на Желєзнїцкей станїци Нови Сад. З тим розпочала габа студентских блокадох хтори ше случую у Беоґрадзе, Новим Садзе, Нишу, Краґуєвцу, алє и у других местох.
Велї декани и професоре на факултетох потримали студентох, алє єст и тих цо их нє потримую.
Студенти ище поручели же блокада нє насилна и же осудзую гоч яке знїщованє маєтку на факултету.