НОВИ САД – Предсидатель Покраїнскей влади Иґор Мирович директором здравствених установох у Войводини и предсидательом општинох Вербас, Жабель Оджак и Печинци вчера на роботней схадзки у Покраїнскей влади уручел контракти за проєкти з хторима буду злєпшани условия за лїченє пациєнтох, як и условия за роботу занятих у здравстве. Вредносц контрактох 137 милиони динари, а средства обезпечени по конкурсу Управи за капитални укладаня Войводини.
Мирович наложел директором здравствених установох и предсидательом локалних самоуправох най такой почню з пририхтованьом потребней технїчней документациї, же би роботи на проєктох за хтори достати средства почали цо скорей и були швидко поробени.
Општини Вербас, Жабель и Оджак достали пенєж за купованє медицинскей опреми за потреби домох здравя, а општина Печинци за купованє санитетней превозки.
На схадзки присуствовал и директор Управи за капитални укладаня АП Войводини Неделько Ковачевич.