РУСКИ КЕРЕСТУР – У дворе Основней и штреднєй школи зоз домом школярох „Петро Кузмяк” штварток, 8. октобра, а у рамикох означованя Дзецинского тижня, отримана друга часц роботней акциї хтору иницировал Совит родичох.
У першей роботнї, хтора отримана вяри, ушорени двор, заменєни табли на кошох и офарбени лавки и корпи за шмеце, а з тей нагоди посадзени коло 20 древка, позаметани двор и позберане лїсце.
Як визначела предсидателька Совиту родичох Силвия Орос Барна, то була нагода нє лєм же би ше дзецом зоз власним прикладом указало як ше треба старац о просторе у хторим пребуваю алє и же би научели як ше садза и допатраю древка. До акциї ше попри родичох и дзецох, уключели и заняти у школи, штредньошколци хтори пребуваю у Доме школярох, як и члени керестурского Добродзечного огньогасного дружтва хтори залївали древка.
Дзири зоз трактором вивартал родитель Михайло Надь, часц древкох донирал Ивица Няради зоз свойого розсаднїку, за другу часц ше остарали родичи зоз добродзечних прилогох, а тиж обезпечели и закуску и ошвиженє за шицких учашнїкох.
