НОВИ САД – Одлука о нових коридорох хтори преширюю „Ошмих Войводини” ше одноши на виробок Просторних планох подручох окремней намени за два инфраструктурни коридори: Кула – Боґоєво и Башаид – Српска Црня.
Тоти коридори повяжу Банат и Бачку зоз будуцу швидку драгу „Ошмих Войводини”, як и зоз гранїчнима преходами до Румуниї и Горватскей.
Планована траса державней драги I класи Кула – Боґоєво длугока коло 45 километри, а предвидзена є за швидкосц 80 километри на годзину, наведзене у документу хтори обявел Завод за урбанизем Войводини. Траса почина од крижней драги зоз державну драгу IБ класи число 15, на гранїци медзи Кулу и Вербасом, далєй идзе южно од Руского Керестура, пререзує беґель Косанчич – Мали Стапар, потим идзе паралелно зоз беґельом Бечей – Боґоєво, а далєй преходзи през зону Оджаку аж по зону пристанїща Боґоєво.
Як наведзене, тота драга представя крак мрежи драгох Сербиї хтора би требала пошвидшац и направиц же би були ефикаснєйши иснуюци цеки од гранїци зоз Горватску, односно пристанїща Боґоєво, спрам авто-драги Е-75 и далєй спрам Суботици и Нового Саду.
Зоз планом будзе анализована и можлївосц повязованя новей транспортней драги зоз иснуюцу и плановану мрежу державних и локалних драгох, зоз намаганьом же би ше число транспортних ґузлох зведло на найменшу можлїву миру, покля би ше потреби привредних и польопривредних обєктох ришовали зоз паралелнима сервиснима драгами.
Друга планована драга Башаид – Српска Црня будзе длугока коло 17 километри, тиж зоз максималну швидкосцу рушаня 80 километри на годзину.
Най здогаднєме, драгу „Ошмих Войводини” ше почало будовац ище у децембру 2023. року.