РУСКИ КЕРЕСТУР – Тогорочни 12. по шоре Медзинародни волонтерски камп у Руским Керестуре почина нєшка, а будзе тирвац по 4. авґуст. Орґанизаторе кампу Туристичне здруженє „Руски Керестур” и Млади виглєдоваче Сербиї, а тогорочни лидер Деян Будински.
Роботнї буду орґанизовани до трох часцох – правенє терену за одбойку на писку на базену, фарбенє огради коло церкви и огради коло будинку Замoк, и роботи у найстаршей рускей хижи.
Очекує ше же приду волонтере з Русиї, Турскей, Мексика, Ирскей и других державох, а буду мац нагоду участвовац и у роботнї котру будзе орґанизовац Здруженє женох „Байка” дзе буду правиц капущанїки, пироги и домашнї резанки.
Остатнї дзень кампу будзе орґанизовани турнир у одбойки на писку з котрим будзе отворени новонаправени терен и заварти тогорочни камп, а шицко зоз преславу успишно поробеней роботи. Участвовац на турниру годни шицки заинтересовани екипи.
Камп потримали велї орґанизациї, здруженя и приватни поднїмателє, алє кажде хто жада помогнуц, на гоч яки способ, зоз спонзорством, то може зробиц и под час кампу.