КУЛА – Дом здравя (ДЗ) Кула за остатнї пейц роки остал без 19 лїкарох, 2015. року заняти лєм єден нови, так же од Министерства здравства нєдавно достал дошлєбодзенє же би на стаємну роботу приял нових штверих дохторох медицини, пишу „Вечарши новосци”. Гоч ма потребу и за специялистами, руководительство ДЗ одлучело пополнїц кадри з лїкарами общей пракси, та двойо буду розпоредзени до Наглей помоци, єден до амбуланти, а єден лїкар до Служби стараня по обисцох.
– Хибя нам психиятер, офталмолоґ и двойо специялисти ґинеколоґиї, алє тих специялистох нєт на лїстини Служби за обезпечованє роботи. Прето зме ришели заняц дохторох общей пракси, а младшим обезпечиме можлївосц специялизациї. Понеже того лєта єдна лїкарка закончела специялизацию, ДЗ тераз ма и стаємного ґинеколоґа – гварел директор ДЗ Кула др Жарко Шевин.
О мешац би мал буц закончени и нови будинок специялистичних службох ДЗ у центре Кули (коло постояцого будинку ДЗ), до чиєй вибудови Општина Кула уложела 75, а Влада Сербиї 55 милини динари.