Медзи єденацецерима зоз Сербиї учашнїки були Мадяре, Горвати и тройо Руснаци зоз Руского Керестура, хтори представели нашу Водицу, продукцию паприґи и други нашо вирски и национални специфичносци.
Медзинародни камп „Чловек швет” Рух фоколарох того року источашнє, од 16. по 23. юлий, орґанизовал на трох локацийох, а медзи нїма и Сербия. Камп орґанизовани у двох фазох – перши тидзень бул у Школско рекреативним центре Делиблатскей писковини – Чардак (при Ковину) а други нєдалєко од Праги у Ческей у горским месце Везмир.
У Ческей концом прешлого мешаца було коло сто учашнїкох, найвецей зоз Белґиї и Ческей, и даскельо особи з Италиї, и Сербиї. Медзи єденацецерима зоз Сербиї учашнїки були Мадяре, Горвати и тройо Руснаци зоз Руского Керестура. Медзи тима цо пришли зоз Белґиї було и надосц вибеженцох зоз Сириї, хтори до тей жеми сцигли пре нєбезпечну ситуацию.
Як дознаваме, у Везмиру ше предлужело преглїбйовац тема кампу „Чловек швет” хтора облапела и способи як пестовац културни и вирски идентитет, роздумованє о актуалних темох и проблематики у християнским швеце. Тото ше найвецей преглїбйовало у чераню думаньох и искуствох през шведоченя.
Циль стретнуца бул и же би ше учашнїки цо баржей упознавали, а то було и през креативни роботнї, дружтвени бависка у природним амбиєнту прекрасних горох, а бул орґанизовани и мултикултурални вечар. На нїм ше представело и характеристики Сербиї, Войводини, та и Руснацох, дзе Керестурци представели и нашу Водицу, продукцию паприґи и други нашо вирски и национални специфичносци.
На концу стретнуца учашнїки три днї препровадзели и у Праги, дзе нащивели велї знаменїтосци того прекрасного городу. Як нам пошведочели учашнїки Керестурци, на Кампу була витворена глїбока духовна и приятельска атмосфера, та ше им наисце було чежко розисц.