Як цо було одлучене на схадзки Одбору за културу Националного совиту Руснацох концом мая, розписани нови
Конкурс за софинансованє проєктох у обласци театралней творчосци Руснацох за дзеци.
Намира Конкурсу потримовка проєктом у обласци театралней творчосци – за пририхтованє дзецинскей представи по руски и участвованє на Драмским мемориялу Петрo Ризнич Дядя 2018. року. Участвовац можу здруженя гражданох, установи, институциї, нєформални здруженя и поєдинци з одвитуюцима проєктами, вкупни буджет Конкурса 90 тисячи динари, а прияви мож посилац по 31. октобер 2017. року. Як потолковала предсидателька Одбору за културу Ґабриєла Саянкович, окрем потримовки за дзецинску селекцию Мемориялу, Конкурс за циль ма и мотивовац ширши круг учашнїкох нашого културного живота:
– За розлику од других формох културней дїялносци Руснацох, як цо хорске лєбо жридлове шпиванє, фолклор и оркестри, чия робота скоро виключно вязана за нашо КУД-и, театрална творчосц часто ше одвива звонка їх рамикох. Намира нам прето, з преширйованьом круга можлївих учашнїкох, потримац и таки способ театралней творчосци – гварела Ґабриєла Саянкович, и наявела же би таки модел потримовки рускому театралному животу могол постац тирваци, и преширени и на театер за одроснутих.
Конкурс плановано розписани з початком школского рока, а тирва по конєц октобра, же би могло ускладзиц школски обовязки и пририхтованє представох, а же би биуло досц часу пририхтац представи за Мемориял. Повторена потримовка дзецинскому театру при Руснацох нєобходна, кед ше зна же остатнї 10 роки у дзецинскей селекциї на Мемориялу углавним було по штири представи, дараз по шейсц, алє було и роки кед на репертоаре було лєм два, лєбо три представи за дзеци. Прияви на Конкурс мож послац до 31. октобра 2017. року, а формулар за приявйованє мож достац у просторийох Националного совиту (Фрушкогорска 64, Руски Керестур), лєбо на интернет боку www.rusini.rs, а цали текст Конкурсу обявюєме на бокох рубрики Информатор.
Здогаднїме, Одбор за културу у маю розподзелєл пенєж по Конкурсу за софинансованє програмох и проєктох у обласци защити нєматериялного културного нашлїдства, хтори у фебруаре розписал Национални совит Руснацох. Конкурс бул наменєни руским културно-уметнїцким дружтвом, як потримовка за програми секцийох з хторима наступя на руских фестивалох и манифестацийох. Цали буджет конкурса бул милион и пол динари, дзе по 300 тисячи розподзелєни на пейц обласци културней дїялносци хтори ше презентую на окремних руских фестивалох – хорске шпиванє, фолклорну творчосц, народни и тамбурово оркестри, жридлове шпиванє и театралну творчосц. Медзитим, теди нє розподзелєна шицка сума наменєни за театер, понеже нє було досц прияви. З дзецинскима представами конкуровали КУД „Тарас Шевченко” з Дюрдьова и Руске КУД „Др Гавриїл Костельник” з Кули, хтори достали по 30 тисячи динари, а РКЦ Нови Сад конкуровал з представу за одроснутих, за хтору додзелєни 80 тисячи динари. Цо значи же за театралну дїялносц нєрозподзелєни остали половка – 90 тисячи резервовани за дзецински театер, и 70 тисячи динари за представи за старших. Як теди догварене, тот пенєж будзе вихасновани же би нарок бул адекватно отримани ювилейни, 50. Мемориял.