ПЕТРОВЦИ (ГОРВАТСКА) – Прешлого викенду, 2. и 3. октобра, отримана XVI Културна манифестация Кед голубица лєцела.
Пияток, 2. октобра, у Доме култури, спред Дружтва Руснак Наталия Гнатко, отворела фото виставу Нашо ювилеї з нагоди 35. рочнїци Шветового конґресу Русинох и 20. рочнїци Форуму младежи Дружтва Руснак. Потим отримани Вечар децинскей фолклорней творчосци Нашо искри, а у програми участвовали: Руснак Дружтво Руснацох у Републики Горватскей, Дзецинскa заградкa Вуковар I, ПO Петровци, ОШ Aнтунa Бaуeрa Вуковар и ПШ Петровци – руски оддзeлєня, КУД Яким Гарди Петровци, КУД Чаковци и Здруженє за пестованє мадярских обичайох Стари Янковци. После програми орґанизована вечера за учашнїкох и госцох у Нових Янковцох.
Всоботу, 3. октобра у Старих Янковцох отримани традицийни схадзки Шветовей ради Шветового конґресу Русинох и Шветовей ради русинскей младежи.
Пополадньова програма за госцох зоз Словацкей, Мадярскей, України, Сербиї и Румуниї почала зоз нащиву петровскей церкви Покрова Пресвятей Богородици у хторей их привитал парох о. Владимир Седлак и поблїжей упознал зоз прешлосцу Руснацох у Петровцох, а окремни акцент бул на нєдавно преславеней 190-рочнїци од снованя церкви.
На Медзинародним филмским вечаре Русинох/Руснацох/Лемкох патрачом бул проєктовани перши бавени филм на русинским язику Потопа.
На централней подїї XVI Културней манифестациї Кед голубица лєцела участвовали: Дружтво Руснак Петровци, КУД Яким Гарди Петровци, КУД Руснацох Осиєк, КУД Осиф Костелник Вуковар, Здруженє за пестованє мадярских обичайох Стари Янковци, сoлистки зоз Словацкей Maриaннa Жeлeзнa и Стефаниа Ковачова, Русински ФС Голубoк Перeґу Mape (Румуния), сoлист Антон Галас зоз Виноградова у Укрaїни и Шветови форум русинскей младежи. Програму нащивел предсидатель Националного совиту Руснацох, Стеван Самочета, як и руски медиї зоз Сербиї. По законченей програми орґанизована заєднїцка вечера за учашнїкох и госцох у Нових Янковцох.
Орґанизатор XVI Културней манифестациї Кед голубица лєцела Руснак Дружтво Руснацох у Републики Горватскей у соорґанизациї зоз MO Петровци, Општину Стари Янковци, Горватска жена Стари Янковци и ДОД Стари Янковци. Манифестация орґанизована под покровительством Совиту за национални меншини Републики Горватскей, а з финансийну потримовку Општини Боґдановци и Стари Янковци.
