Живот вецейраз нє пита чи чежко, чи мож витримац и як предлужиц далєй, окреме теди кед приноши препреченя котри треба звладац. Тот исти живот учи же ше треба бориц и нє придавац ше. Тото найлєпше зна Снежана Штрбац, мац, и вельки борец, котра и после найчежких хвилькох кед остала без супруга, предлужела фамелийну роботу котру вєдно започали.
И у заградкарстве, и у тарґовини робота нє лєгка, и то добре зна кажде тот хто исте роби. Нєт ту кеди за дацо инше, окреме за одпочивок. Роботного часу нєт, нєпреривно ше треба закладац, провадзиц тренди… И робиц, робиц…
– Роками пестуєм и предавам квеце, а почали зме тото робиц зоз супругом, перше зоз желєняву, а познєйше зме прешли на квеце. З квецом ше баржей виплацело робиц як зоз желєняву, та сом каждого року садзела вше вецей, гоч робота коло нього вимага вецей часу. Понеже у пластенїку нє маме зогриванє, з квецом починам робиц од марца, та аж по позну єшень – гвари Снежана.
А тераз прави час зоз квецом ожелєнїц и прикрашиц заградку, балкони и двори, вшадзи там дзе през лєто мож уживац на отвореним. У Снежановей заградки мож найсц праве такого, дробного квеца як цо беґония, петония, сурфиния.., а ту и мушкатли… Лєм треба робиц.
– Вше ми у шицких роботох помагал супруг, а тераз помагаю дзеци, кеди-нєкеди пририхтаю квеце за пияц, поприноша, поодноша, алє вони за роботу у заградкарстве и у тарґовини нєзаинтересовани. Практично, остала сом сама, гоч мушим повесц, и родичи ми тиж помагаю тельо кельо можу – приповеда наша собешеднїца.
КЕД ЄДНА РОБОТА ПРЕПАДЛА, ЛАПАЛИ ШЕ ДО ДРУГЕЙ
Снежана Штрбцова добре памета же накадзи ше побрали, и вона и єй Неделько вєдно робели у фамелийним бизнису – у тарґовини. Штернац роки у Коцуре тримали предавальню з вшелїяку робу, мали свой локал и нє мали векши трошки, алє накадзи почала експанзия вельких маркетох и предавальньох, робота вше слабше ишла, та предавальню заварли. Теди предлужели набавяц робу котру предавали на пияцу.
– Сцели зме чесно робиц, кажди динар зме держави на час виплацели, алє зме нє мали хасну остац у тей роботи, бо нас вельки маркети загартушели. И якошик, праве теди кед зме заварли предавальню, почали зме з роботу на пияцу, а о рок и зоз квецом – здогадує ше Снежана.
Вона на пияцу предава и другу робу хтора углавним у сушедней держави туньша, а котру отамаль, з Мадярскей ту приноши. Так же, кед нє сезона квеца, вец частейше ходзи прейґ гранїци по робу, и наспак, а на пияц ходзи, такповесц кажди дзень.
– Тераз ходзим на наш коцурски пияц, потим до Савиного Села, до Силбашу и до Руского Керестура. Ходзела сом и частейше, алє тераз уж нє можем шицко постарчиц. Интересантне тото же ше, наприклад, квеце нє предава у шицких местох єднак. Даґдзе воля єдну файту, даґдзе другу, та вец уж и сама знам цо и дзе однєшем. Кед поровнам роботу з Мадярскей котру мам през цали рок, и тоту з квецом, з квеца заш лєм векши хасен, алє з нїм и робота векша и напартейша. После пияцу ше нє мам кеди одпочивац, бо уж треба залївац, прикармйовац го, и рихтац за пияц шлїдуюцого дня. И так доокола – приповеда Снежана о своєй роботи.
– Квеце люби кед ше го допатра, то єдине правило же би воно обстало и напредовало. Без допатраня и пестованя ридко хторе квеце може буц красне, богато квитнуц и длуго прикрашовац гоч котри простор. Треба и добре вибрац праве место дзе воно будзе стац – толкує Снежана, вше порихтана и посовитовац.
ПАТРИ ЛЄМ НАПРЕДОК
Снежана остала ґдовица кед єй супруг нагло умар после чежкей хороти. Гоч дзеци нє барз заинтересовани за заградкарство и тарґовину, мацери су велька потримовка и велька радосц.
– Дала сом им шансу най вибераю, най пробую робиц тото цо жадаю, а робота котру маме ту, вше их чека кед тото надумаю. Синове – леґинє, старши Небойша ма 21 рок, Далибор 18, а дзивка Марина 16 роки. Младши син жиє и роби у Беоґрадзе, задовольни є, старши бул робиц у Словацкей, а планує пойсц до Нового Саду и там найсц роботу. Марина ище ходзи до стреднєй школи, та є ту при мнє – гвари Снежана.
У чаше кед ше Снежанов супруг Неделько похорел, цала фамелия преходзела през чежки хвильки. Снежана вельки борец, и у найчежших хвилькох була свидома же окрем потїхи и любови котру єдни другим можу дац, треба и робиц и обстац.
– Вше сом ше зочовала з проблемами, и припознавам, було барз чежко, и тераз чежко, алє живот єдна борба и мушиме шицки вєдно дриляц далєй. Робим шицко цо у моєй моци же бим дзецом оможлївела цо лєгчейши днї, же бизме упрекосц шицкому були нашмеяни, а од роботи ше нє боїм – шмело гвари Снежана.
